კორონავირუსის გავრცელების კუთხით ქობულეთი კვლავ წითელ ზონად რჩება. 12 აპრილს, მუნიციპალიტეტის 4 სოფელი - გვარა, მუხაესტატე, წყავროკა და ლეღვა კარანტინის ზონად გამოცხადდა. რა ხდება „წითელ ზონაში“ მოქცეულ სოფლებში, სადაც მოსახლეობა მეორე კვირაა ჩაკეტილია. უზრუნველყოფს თუ ვერა ქობულეთის მერია ადგილობრივთა მოთხოვნის შესაბამისად სურსათისა და მედიკამენტების მიწოდებას? სალომე უსტალიშვილი არკვევდა.
ქობულეთის ოთხი სოფელი უკვე კვირაზე მეტია ,,წითელ ზონაშია’’ მოქცეული. სოფლებში-გვარასა და ლეღვაში ბლოკპოსტებია მოწყობილი. ტერიტორიას 24 საათის განმავლობაში სამხედრო და საპატრულო პოლიციის ეკიპაჟები აკონტროლებენ. შესვლა მხოლოდ მედიკოსებს და სადისტრიბუციო ავტომობილებს შეუძლიათ.
ადგილობრივების საკვებით თუ სხვა საჭიროებებით უზრუნველყოფა მთავრობის მიერ, ქობულეთის მუნიციპალიტეტის ხელმძღვანელობას აქვს დავალებული. უზრუნველყოფს თუ ვერა მერია მოთხოვნის შესაბამისად მიწოდებას? სოფელ გვარაში ამბობენ, რომ სურსათი ყოველდღიურად შედის სოფელში, ხოლო, მაგალითად მედიკამენტის მიწოდება იმ შემთხვევაში ხდება, თუ კი კონკრეტული მოთხოვნა იქნება.
სხვა რეალობაა სოფელ მუხაესტატეში. ჩვენი რესპოდენტი აღნიშნავს, რომ სოფელში გაუსაძლისი მდგომარეობაა შექმნილი, რომ კარანტინის პერიოდში, მათთვის არც საკვები და არც მედიკამენტები შეაქვთ. მამუკა კომახიძე აცხადებს, რომ თუ სოფელს ყურადღებას არ მიაქცევენ, ადგილობრივები შექმნილ მდგომარებაში ცხოვრებას ვეღარ შეძლებენ.
იგივეს აცხადებს ჩვენი რესპოდენტი სოფელ ლეღვადანაც. ელისო მამულაძე ყვება, რომ მას შემდეგ, რაც წითელ ზონაში მოხვდნენ, თვითმმართველობიდან არავინ უნახავთ და ადგილობრივებს უკვე ეწურებათ საკვებისა და მედიკამენტების მარაგი.
ქვეყნის მასშტაბით საგანგებო მდგომარეობა მიმდინარე წლის 21 მარტს გამოცხადდა, დღეს მიღებული გადაწყვეტილებით კი ვადა 22 მაისის ჩათვლით გახანგრძლივდა.
1
s
s
s