26 დღიანი მკაცრი კარანტინის რეჟიმი ქობულეთის 4 სოფელში უკვე დასრულდა. გვარასა და ლეღვაში ბლოკპოსტების დემონტაჟი დილით განხორციელდა. გადაწყვეტილებას იმ გარემოებით ხსნიან, რომ ქობულეთის კლასტერიდან უკვე ერთი კვირაა ახალი ინფიცირების შემთხვევა არ გამოვლენილა. რა ხდება ე.წ. „წითელ ზონაში“ მოქცეულ სოფლებში მას შემდეგ, რაც 11 ათასი ადამიანი, თითქმის ერთი თვის განმავლობაში, იზოლაციაში იმყოფებოდა? რას ამბობენ ადგილობრივები? ვნახოთ სიუჟეტი.
უკვე მერვე დღეა აჭარაში კოვიდინფიცირების ახალი შემთვევა არ გამოვლენილა. როგორც პასუხისმგებელი პირები აცხადებენ, სწორედ ეს გახდა საფუძველი იმისა, რომ ქობულეთის ოთხს სოფელში 26 დღიანი მკაცრი კარანტინი დასრულებულიყო. გვარაში, ლეღვაში, მუხაესტატესა და წყავროკაში შესვლა და გასვლა უკვე თავისუფლადაა შესაძლებელი. ადამიანები გათავისუფლდნენ თვითიზოლაციისგანაც. ბლოკპოსტების დემონტაჟი დილიდან დაიწყო.
ე.წ. „წითელ ზონაში“ მოქცეული სოფლების იზოლაციიდან გათავისუფლება საავტომობილო გზებზე პირველივე საათებში გახდა თვალშისაცემი. მიუხედავად იმისა, ადგილობრივები ამტკიცებენ, რომ იზოლაციის პერიოდში არც სურსათის მიწოდების პრობლემა ჰქონდათ და არც მედიკამენტებით უზრუნველყოფის, სამოძრაოდ საქმეები მაინც მრავლად დაუგროვდათ.
ადგილობრივების საკვებით თუ სხვა საჭიროებებით უზრუნველყოფა მთავრობის მიერ, ქობულეთის მუნიციპალიტეტის ხელმძღვანელობას ჰქონდა დავალებული. მკაცრი კარანტინისგან გათავისუფლებულ სოფლებში დღეს ადგილობრივები აცხადებენ, რომ სურსათი ყოველდღიურად მიეწოდებოდათ.
ქობულეთის მუნიციპალიტეტის ოთხი სოფელი: გვარა, მუხაესტატე, წყავროკა და ლეღვა „წითელ ზონად“ 12 აპრილს გამოცხადდა. ბლოკპოსტები გვარასა და ლეღვაში იყო მოწყობილი. თითქმის ერთთვიანი იზოლაციის ვადაში კოვიდ 19-ზე ოთხივე სოფლის 11 ათასი მაცხოვრებელი შემოწმდა. ჯამში მუნიციპალიტეტში 33 ათას 788 პირის თერმოსკრინინგი განხორციელდა. აქედან 572 ქობულეთის კლასტერს ეკუთვნოდა. ინფექცია 36 შემთხვევაში დადასტურდა, ერთი კი გარდაიცვალა.
7
s
s
s