02, ივნისი 2020 21:17:00
პანდემიის კიდევ ერთი უარყოფითი მხარე და უშემოსავლოდ დარჩენილი გიდები. იმის გამო, რომ ქვეყანაში უცხოელი ტურისტი არ შემოდის, ექვსკურსიათ-მძღოლები სამსახურის გარეშე დარჩნენ. პრობლემა მხოლოდ ეს არ არის. საქმე იმაშია, რომ მათ ვერც სახელმწიფოს დახმარება მიიიღეს. ანუ ფულადი შემწეობის გარეშე დარჩნენ ადამიანები, რომლებიც ჩვენს ქვეყანას, მის იმიჯს საერთაშორისო ასპარეზზე წარმოაჩენდნენ.
ადამიანები, რომლებიც ქვეყნის ღირსშესანიშნაობებზე, საერთაშორისო ტურისტებისთვის პირველი ახდენენ შთაბეჭდილებას, პანდემიის პირობებში უფუნქციოდ დარჩნენ. გვიყვებიან, რომ აჭარაში ტურისტული სეზონი მარტის თვეში იწყება და შემოდგომაზე სრულდება, შესაბამისად მათ უკვე გამოტოვეს მნიშვნელოვანი პერიოდი და დარჩნენ შემოსავლის გარეშე. გიდები ამბობენ, რომ სახელმწიფოს მიერ დაწესებული ფულადი დახმარება მათზე არ მოქმედებს, რადგან 2020 წელში მათ არ უფიქსირდებათ სახელფასო ჩარიცხვა.
ტურიზმი მთავარი პრიორიტეტია, თუმცა დარგის სპეციალისტები ამბობენ, რომ სპეციალური კანონი ტურიზმში ჩართული ადამიანების მდგომარეობას, საგანგებო სიტიაციებში არ იცავს.
შემოსავლის მისაღებად საუკეთესო სამი თვე რომ გამოტოვეს, საუბრობენ ტურისტულ სააგენტოებშიც. მიუხედავად იმისა, რომ სახელმწიფოს მხრიდან მათ მიიღეს საშემოსავლო გადასახადების ნაწილში დახმარება, საკმარისი არ აღმოჩნდა. ამბობენ, რომ თანამშრომლების შენარჩუნებისთვის საშეღავათო პერიოდი და დაბალ პროცენტიანი საბანკო სესხების მიღება სჭირდებათ.
სახელმწიფოს მხრიდან მიღებული დახმარება, რომ საკმარისი არ არის ამაზე საუბრობს ტუროპერატორი „აჭარატურის“ გენერალური დირექტორიც. ამბობს, რომ საერთაშორისო ვიზიტორებს დაახლოებით ერთ თვეში ელოდებიან, თუმცა მათ ჯერ კიდევ არ იციან, თუ რა გაიდლაინებით მიიღებენ ტურისტებს.
აჭარის ტურიზმის დეპარტამენტში ამბობენ, რომ მიმდინარე წლის სეზონისთვის, გიდები და ტუროპერატორები, დისტანციურ რეჟიმში გაივლიან ტრენინგს თემაზე, რომელიც მათ ტურისტებთან , ახალი რეგულაციების ეფექტურად დანერგვაში დაეხმარებათ, თუმცა რეგულაციები ჯერ შემუშავებული არ არის.
იმის გამო, რომ საზღვრები ჩაკეტილი იყო და მიმოსვლა აკრძალული, ცხადია, გიდებს მიმდინარე წელს რაიმე სახის შემოსავალი ვერ დაუფიქსირდებოდათ. სწორედ ამიტომ მოკლებული არიან შესაძლებლობას, შემოსავლების სამსახურს რაიმე სახის დოკუმენტი წარუდგონონ იმის მტკიცებულებად, რომ არიან თვითდასაქმებულები. რა პასუხი აქვს მათ მიმართ სახელმწიფოს, გაითვალისწინებს თუ არა არსებულ მდგომარეობას, დღეს პასუხი ჩვენთვისაც ღია დარჩა. შეკითხვებს არცერთ პასუხისმგებელ სტრუტურში უპასუხეს.