კოვიდ19 - ვირუსი, რომელმაც ათასობით ადამიანი შემოსავლის გარეშე დატოვა. პანდემიის ფონზე, იმ პირობებში როცა სოციალური ღონისძიებები აიკრძალა, მძიმე მდგომარეობაში აღმოჩნდა სფერო, რომელიც საქორწინო წვეულების გალამაზებაზე ზრუნავდა. სამსახური დაკარგეს კონდიტერებმა, მომღერლებმა, მოცეკვავეებმა და სალონებმა, რომლებიც საქორწინო კაბებს კერავენ. რას ამბობენ ახლა თვითდასაქმებულები? ჩემმა კოლეგამ მოისმინა.
გურანდას ქალაქში ბევრი იცნობს. იგი საქორწინო წვეულებებისთვის ტორტს წლებია აცხობს. კონდიტერის ერთადერთი შემოსავალიც სწორედ ეს არის, თუმცა კორონავირუსის პანდემიამ სხვა ბევრის მსგავსად, ისიც უმუშევარი დატოვა. სააღდგომო მარხვის შემდეგ ორმოცდაათამდე შეკვეთა გაუუქმდა.
კორონავირუსის გავრცელების პრევენციისთვის დაწესებულმა აკრძალვებმა, თავისთავად, შემოსავლის გარეშე დატოვა სალონები, რომლებიც საქორწინო კაბებს კერავენ, ყიდიან, ან აქირავებენ. ეკონომიკური კრიზისის მიუხედავად, დიზაინერებმა დრო ამაოდ არ გააცდინეს და ახალ მოდელებზე აქტიურად იმუშავეს. იმედოვნებენ, რომ მასშტაბური ქორწილები ნებადართული მალე გახდება და კაბებზე მოთხოვნა გაიზრდება.
მას შემდეგ, რაც მასშტაბური ქორწილები აიკრძალა, შემოსავლის გარეშე დარჩნენ მოცეკვავეები, მუსიკოსებიც, ის ჯგუფები და შემსრულებლები, რომლებიც საქორწინო დარბაზებთან თანაშრომლობენ და მომხმარებლებს ერთობლივ სერვისს აწვდიან. მიუხედავად ფინანსური კრიზისისა, მუსიკოსებმა დრო ამ შემთხვევაშიც სასარგებლოდ გამოიყენეს.
ამ ეტაპზე მხოლოდ ათკაციანი ქორწილების გადახდაა ნებადართული. იუსტიციის მინისტრის მიერ განსაზღვრულია იმ ადამიანების ვინაობაც, ვისაც დასწრება შეუძლია. უახლოესი ადამიანების გარდა, წყვილს მხოლოდ ფოტოგრაფის დაქირავება შეუძლია.
3
s
s
s