26, ივნისი 2020 21:45:00
ნათესაური კავშირები, შერჩევითი სამართალი და დაუსჯელი კანონდამრღვევები. მაშინ, როცა ზენითის საბავშვო ბაღში მომხდარ ფაქტზე ადგილი რამდენიმე დარღვევას ჰქონდა, ქობულეთის მერიამ პასუხიმგებლობის დაკისრების ყველაზე მსუბუქი ფორმა გამოიყენა. რა არგუმენტებით აბათილებს კანონდარღვევებს მუნიციპალიტეტი? თემის დეტალებით ახლა პირდპაირ ეთერში სულხან მესხიძე შემოგვიერთდება. სულხან, გისმენთ.
მიუხედავად იმისა, რომ ჩვენ კანონდამრღვევები ვამხილეთ იმის მოლოდინი არ გვქონდა, რომ ფაქტზე ქობულეთის მერია მკაცრ რეაგირებას მოახდენდა. ეს განცდა კი მას შემდეგ გაგვიჩნდა, რაც ჩვენს ეთერში გასული რეპორტაჟის შემდეგ დამატებითი ინფორმაცია მოგვაწოდეს. საქმე ისაა, რომ საჯარო ბაღის გამგე მუნიციპალიტეტის მერის მირიან ქათამაძის ბიძაშვილის ცოლია. ნათესაური კავშირი ამით არ იწურება. ირინე ვერულიძის მაზლი ქობულეთის მერიის არქიტექტურისა და სივრცითი მოწყობის სამსახურის უფროსია, ხოლო მული ქეთევან ქათამაძე საკრებულოს დეპუტატი. ირინა ვერულიძე ბაღის გამგედ 2017 წელს უკონკურსოდ განცხადების საფუძველზე დანიშნეს. ამ გარემოებაზე დღეს ქობულეთის მერიაში საუბარი არ ისურვეს.
ქობულეთის მერიამ პრობლემა ვერც იმაში დაინახა, რომ ბაღის თანამშრომლები გადაღებისას სიტყვიერად და ფიზიკურად გაგვისწორდნენ, რა დროსაც კამერის დამტვრევასაც ცდილობდნენ. წერილობით კომენტარში, რომელიც უწყებიდან მივიღეთ, ამაზე არაფერი წერია. კადრები, რომელიც ჩვენმა მაყურებელმა ნახა საბავშვო ბაღში 10-ზე მეტი ადამიანის შეკრებას ასახავდა, თუმცა მერიაში საპირისპიროს ამტკიცებენ.
მიუხედავად იმისა, რომ პანდემიის პირობებში თავშეყრა არ არის რეკომენდირებული ზენითის საბავშვო ბაღში ბანკეტის გამართვა იმით ახსნეს, რომ პატარებს გამოსამშვიდობებელი საღამო ჰქონდათ. მას შემდეგ, რაც აღნიშნული თემის შესახებ ჩვენს ეთერში მასალა გავიდა TV 25-ს წყარომ შეატყობინა, რომ ქობულეთის ყველა საბავშვო ბაღში ჩანიშნული ღონისძიება გააუქმდა.