30, ივნისი 2020 18:30:00
''ხოფის'' ბაზრობის მოვაჭრეები 5 თვის განმავლობაში ძირითადი საიჯარო გადასახადისგან გათავისუფლდებიან. აჭარის მთავრობა ასევე, სეტყვის შედეგად დაზარალებულ 900-ზე მეტ ოჯახს დაეხმარება. განცხადებები დღეს, აჭარის მთავრობის სხდომაზე თორნიკე რიჟვაძემ გაახმოვანა. პარალელურად, სხდომაზე დღის წესრიგით გათვალისწინებული სულ სამი საკითხი განიხილეს.
ე.წ. ხოფის ბაზრობის მოვაჭრეები, ძირითადი საიჯარო გადასახადისგან, 5 თვის ვადით გათავისუფლდებიან. გადაწყვეტილება დღეს, აჭარის მთავრობის სხდომაზე გახდა ცნობილი.
დღევანდელ სხდომაზე კიდევ ერთ მნიშვნელოვან საკითხზე იმსჯელეს. მიღებული იქნა გადაწყვეტილება, სეზონური მოიჯარეებისთვის, რომლებიც სანაპიროზე საქმიანობენ, საიჯარო ხელშკრულებები შეღავათიანი პირობებით გაფორმდეს. მთავრობამ მუნიციპალიტეტებს შუამდგომლობებით უკვე მიმართა.
დღესვე, მთავრობის სხდომაზე, ცნობილი გახდა, რომ მაღალმთიან აჭარაში, სეტყვის შედეგად დაზარალებული 900-ზე მეტი ოჯახი მიყენებული ზარალის საკომპენსაციოდ დახმარებას მიიღებს. თორნიკე რიჟვაძის განცხადებით, წელს ბიუჯეტის კორექტირებისას, გაითვალისწინებენ მეციტრუსეების პრობლემებსაც.
დღევანდელ სხდომაზე აჭარის მთავრობის თავმჯდომარემ დახმარებისთვის ჯანდაცვის სამინისტროსა და დასაქმების სააგენტოს მოუწოდა. სურს, დახმარება იმ მოქალაქეების რეგისტრაციისთვის, რომლებიც სამუშაოდ თურქეთში დადიოდნენ და რომელთა მიმართაც, ერთჯერადი 300 ლარიანი დახმარების გაცემა რამდენიმე დღის წინ გადაწყდა.
აჭარის განათლების მინისტრმა, დებულებაში შეტანილ იმ ცვლილებებზე ისაუბრა, რომლის მიხედვითაც, გარკვეულ უფლებამოსილებებს საქართველოს განათლების სამინისტროსგან დამოუკიდებლად განახორციელებს. მათ შორის, უფლება ექნება, გაათავისუფლოს სკოლის დირექტორი, თუ კი ერთი წლის განმავლობაში ორ წერილობით გაფრთხილებას მიიღებს.
ერთი საკითხი ჰქონდა წარდგენილი აჭარის ფინანსთა და ეკონომიკის სამინისტროს. მიმდინარე წელს, ახალშენში 250 აღსაზრდელზე გათვლილი საბავშვო ბაღი აშენდება.
დღევანდელ სხდომაზე თორნიკე რიჟვაძემ საკონსტიტუციო ცვლილებებიც შეაფასა და განაცხადა, რომ კონსულტაციები აჭარაშიც დაიწყო.