ტურისტული სეზონი და ცარიელი ქობულეთის სანაპირო. კორონავირუსის პანდემიამდე მსგავსი სურათი მუნიციპალიტეტს არ ახსოვს. დამსვენებლების სიმცირეზე საუბრობენ კვებისა და განთავსების ობიქტების და სასტუმროების მეპატრონეებიც. ადგილობრივების ერთადერთი იმედი ახლა, საზღვრების გახსნა და რეგულარული საერთაშორისო ფრენების აღდგენაა.
ქობულეთის სანაპირო, ივლისის დასაწყისში ისეთი ცარიელი არასოდეს ყოფილა, როგორც წელს. კორონავირუსის პანდემიის მიზეზით, აქ ახლა სულ სხვა სურათი გვხვდება. საბანაოდ მხოლოდ ადგილობრივს თუ შეხვდებით და ისიც კანტი-კუნტად. მიუხედავად იმისა, შიდა ტურისტული სეზონი თვეზე მეტია გაიხსნა, ქობულეთისთვის ეს შეღავათი ვერ აღმოჩნდა.
დაცარიელებული კაფე-ბარები და მომხმარებლებისგან მივიწყებული რესტორნები - დამსვნებლების სიმცირეს ყველაზე კვებისა და განთავსების ობიქტების მეპატრონეები უჩივიან. ამბობენ, რომ წინა წლებში, ზაფხულის ანალოგიურ პერიოდში, მომხმარებლების რიგი იდგა, წელს კი მუშაობა ფაქტიურად არ აქვთ.
იმის იმედად, რომ სეზონი წარმატებული იქნებოდა, ბევრმა კუთვნილ სასტუმროებში, მეტი კომფორტის შესაქმნელად და სერვისების გასაუმჯობესებლად, წლის დასაწყისში ახალი საბანკო სესხები აიღეს. მიუხედავად იმისა, რომ პანდემიის მიზეზით გადახდების გადავადება შესაძლებელია, ისინი ფიქრობენ, რომ ფინანსური მდგომარეობა იმდენად დაუმძიმდებათ, გადახდას ვერც ამ საშეღავათო პერიოდის გასვლის შემდეგ შეძლებენ, მით უფრო ის პირები, რომლებსაც სესხი წელიწადში ერთხელ, ზაფხულის ბოლოს აქვთ შესატანი.
ადგილობრივების ერთადერთი იმედი, საზღვრების გახსნა და რეგულარული საერთაშორისო ფრენების აღდგენაა. აეროპორტებს სრული დატვირთვით მუშაობა 15 ივლისს უნდა განეახლებინათ, თუმცა მთავრობის გადაწყვეტილებით, ფრენები თვის ბოლომდე ისევ შეზღუდული რჩება.
3
s
s
s