ქობულეთში, სოფელ დაგვაში მცხოვრები სოციალურად დაუცველი ოჯახი სახლში, ბუნებრივი აირის შეყვანას ითხოვს. როგორც გეგიძეები ამბობენ, მოთხოვნით ქობულეთის მერიას რამდენჯერმე მიმართეს, თუმცა უშედეგოდ. თავად მუნიციპალიტეტში კი ამბობენ, რომ შესაბამისი დოკუმენტაციის მიღების შემდეგ, გეგიძეების მოთხოვნას დააკმაყოფილებენ.
სოფელ დაგვაში, გაზსადენი უკვე სამი წელია გაყვანილია, თუმცა ოჯახების დიდმა ნაწილმა ბუნებრივი აირის სახლში შეყვანა ამ დრომდე მაინც ვერ უზრუნველყო. მიუხედავად იმისა, სოციალურად დაუცველის სტატუსის მქონე ოჯახებს, გაზიფიცირება უფასოდ ეკუთვნით, დარიკო ჯოიძეს კომუნალური სერვისი მაინც არ აქვს.
წერილობითი თხოვნით, მოახდინონ ოჯახის გაზიფიცირება, არაერთხელ მიმართეს ქობულეთის მერიას, თუმცა უწყებისგან პასუხი ჯერ კიდევ არ მიუღიათ. იმის გამო, რომ ფინანსები და ჯანმრთელობა ხელს არ უწყობს, ოჯახის უფროსი ვერც შეშის დამზადებას ახერხებს.
გეგიძეების გასაჭირზე საუბრობენ მეზობლებიც. ყვებიან, რომ ოჯახში ორი მძიმე პაციენტი და 3 მცირეწლოვანი ცხოვრობს.
ქობულეთის მერიაში ტრადიცია არც ამჯერად დაარღვიეს და კვლავ წერილობით გვიპასუხეს. უწყების პრეს-ცენტრის მიერ მოწოდებული ინფორმაციის თანახმად, გეგიძეების მოთხოვნას მალე დააკმაყოფილებენ, თუმცა, წერილში უწყება არ საუბრობს იმაზე, თუ რატომ არ აღმოუჩინეს ოჯახს კუთვნილი დახმარება სამი წლის განმავლობაში.
15
s
s
s