15, ივლისი 2020 20:05:00
11 მომხრე და არცერთი წინააღმდეგი - ბათუმის შოთა რუსთაველის სახელმწიფო უნივერსიტეტს მერაბ ხალვაში მეორედ უხელმძღვანელებს. იგი ამ პოსტს 2016 წლიდან იკავებდა. ხალვაში ფარული კენჭისყრით 11 წევრისგან შემდგარმა აკადემიურმა საბჭომ აირჩია. არჩევნებში მონაწილეობას მოქმედ რექტორთან ერთად, აჭარის განათლების ყოფილი მინისტრი და ბსუ-ს ასოცირებულიპროფესორი, ინგა შამილიშვილი იღებდა. რომელმაც შედეგს პოლიტიკური გადაწყვეტილება უწოდა. შამილიშვილმა აღნიშნა, რომ მისი მოლოდინი გამართლდა და კონკურსში მონაწილეობა მხოლოდ პროცესის ლუსტრაციისთვის მიიღო.
ბათუმის შოთა რუსთაველის სახელმწიფო უნივერსიტეტს, უკვე მეორე ვადით, მერაბ ხალვაში უხელმძღვანელებს. საკუთარი ხმის გარდა, ფარულ კენჭისყრაზე კანდიდატმა აკადემიური საბჭოს 10-ვე წევრის მხარდაჭრა მიიღო. იგი უნივერიტეტის რექტორის პოსტს 2016 წლიდან იკავებს.
არჩევანი საბჭოს წევრებმა წარდგენილი სამოქმედო გეგმის მიხედვით გააკეთეს. მერაბ ხალვაშმა, ძირითადად, 2016 წლიდან დღემდე გაწეული საქმიანობა შეაჯამა. დახურულ კარს მიღმა მიმდინარე პრეზენტაციაზე, კანდიდატმა წევრების შეკითხვებსაც უპასუხა.
მერაბ ხალვაშს კონკურენციას ინგა შამილიშვილი უწევდა. იგი აჭარის განათლების ყოფილი მინისტრი და ბსუ-ს ასოცირებული პროფესორია. შამილიშვილმს ყურადღება სწავლა-სწავლების პრინციპსა და პროგრამულ განვითარებაზე ჰქონდა გამახვილებული. კანდიდატს არცერთი ხმა ერგო. გამარჯვებისთვის იბრძოდა, თუმცა ამბობს, რომ შედეგი მისთვის მოულოდნელი არ ყოფილა.
ბათუმის შოთა რუსთაველის სახელმწიფო უნივერსიტეტის რექტორს, მომდევნოდ, აკადემიური საბჭო, 2024 წელს აირჩევს.