უსკო ახალი წევრებით კომპლექტდება. 3 წევრს ვადა დაახლოებით ერთ თვეში ეწურება. კანონმდებლობის შესაბამისად, კონკურსი გამოცხადდა. თანამდებობებაზე მოხვედრის სურვილი კი 21-მა კანდიდატმა გამოთქვა. მთავრობის თავმჯდომარემ 6 მათგანი შეარჩია და უმაღლეს საბჭოს ასარჩევად გუშინ წარუდგინა. კითხვითი ნიშნები კანდიდატების ირგვლივ უკვე გაჩნდა. ოპოზიცია ამტკიცებს, რომ რეგიონის პირველ პირს უსკოში სანაცნობო წრის მიყვანა სურს. უმაღლესი საარჩევნო კომისია რეგიონში უმაღლესი საბჭოს არჩევნების მომზადებასა და გამართვაზე, ასევე საარჩევნო კანონმდებლობის შესრულებაზეა პასუხისმგებელი.
უფლებასილების ვადა უმაღლესი საარჩევნო კომისიის სამ წევრს დაახლოებით ერთ თვეში ეწურება. თორნიკე მჟავანაძის, ზურაბ გოლიაძის და რამაზ გოლომანიძის შემცვლელი კადრები უმაღლესმა საბჭომ 23 აგვისტოს უნდა დაამტკიცოს.
შესარჩევი კანდიდატების სია უმაღლეს საბჭოს მთავრობის თავმჯდომარემ გუშინ წარუდგინა. თორნიკე რიჟვაძემ თითოეულ ვაკანტურ პოზიციაზე ორ-ორი კანდიდატურა, სულ ექვსი პირი დაასახელა. კონკურსის წესით შერჩეულების ჩამონათვალი ასე გამოიყურება:
რამაზ ბოლქვაძე – ხულოს საოლქო კომისიის ყოფილი თავმჯდომარე 2006-2010 წლებში.ირაკლი გვარჯალაძე –ბათუმის საოლქო საარჩევნო კომისიის დროებითი წევრი. მარიამ გუგუნავა –უმაღლესი საბჭოს აპარატის თანამშრომელი. სოფო დიასამიძე – სტომატოლოგი, რომელსაც საუბნო კომისიებში მუშაობის გამოცდილება აქვს. ნოდარ მელაძე – ხულოს საოლქო კომისიის მოქმედი თავმჯდომარე. დავით ფარტენაძე – ის სსიპ ტექნიკური და სამშენებლო ლაბორატორიის თანამშრომელია და აქვს საუბნო საარჩევნო კომისიაში მუშაობის გამოცდილება
TV 25-სთვის ცნობილი ხდება, რომ რიჟვაძის მიერ წარდგენილი რამდენიმე კანდიდატი მმართველ გუნდთან დაახლოებული პირია. ნოდარ მელაძის რძალი, ანზორ ბოლქვაძის შვილია. ბოლქვაძე საქართველოს პარლამენტში მაჟორიტარი დეპუტატია მაღალმთიანი აჭარიდან. მარიამ გუგუნავა მთავრობის აპარატის იურიდიული დეპარტამენტის უფროსის მეუღლეა. რამაზ ბოლქვაძეს კი, როგორც სოციალური ქსელიდან გავარკვიეთ, მმართველი გუნდის წევრთან, დავით ბაციკაძესთან ერთად ბევრი საერთო ფოტო აქვს. სწორედ ამ კავშირებზე მიუთითებს ოპოზიცია.
რეგიონის პირველი პირის არჩევანი გაურკვეველია უსკოს მოქმედი წევრებისთვის. თორნიკე მჟავანაძე ამბობს, რომ თორნიკე რიჟვაძის რჩეულთა სიაში მისთვის ნაცნობი, გამოცდილი კადრების სახელ-გვარები ვერ მოხვდა.
რა დამსახურების მიხედვით შეარჩია აჭარის მთავრობის თავმჯდომარემ ვაკანტური პოზიციისთვის 6 ადამიანი ან რის გამო ვერ მოხვდნენ სიაში უმაღლესი საარჩევნო კომისიის მოქმედი წევრები - ეს ჩვენთვის გაუგებარი დარჩა. რიჟვაძემ კითხვებზე პასუხს თავი დღესაც აარიდა. თავად კანდიდატები ასე გვპასუხობენ:
ახლა ჯერი უმაღლეს საბჭოზეა. სწორედ წარმომადგენლობითმა ორგანომ უნდა გადაწყვიტოს, ვის ექნება სამომავლოდ მათი დაკომპლექტების უფლებამოსილება. უმაღლეს საბჭოში უსკოს წევრების შესარჩევი ფარული კენჭისყრა 23 აგვისტოს ჩაინიშნა. წევრებს 5 წლიანი ვადით აირჩევენ.
2
s
s
s