31, ივლისი 2020 17:59:00
პირველი მოხსენება ვიცე-მერის პოზიციიდან. ლაშა კომახიძის მემკვიდრე დღეს საკრებულოს წინაშე პირველად წარსდგა. თუ კი არჩილ ჩიქოვანის სიტყვებს ვენდობით, ძირითადი ინფრასტრუქტურული სამუშაოები ქალაქში 2 თვეში დასრულდება. არჩილ ჩიქოვანი კიდევ რამდენიმე მიმართულებაზე აქცენტირდა. სხდომას ტრადიციულად, ხმაურის გარეშე არ ჩაუვლია. ოპოზიციამ მთავრობის თავმჯდომარის მეგობარსა და ქალაქის დანიშნულ მერს ის პერიოდი გაახსენა, როცა წინა ხელისუფლების პირობებში, სამართალდამცავ უწყებებში მუშაობდა და ერთ-ერთ საპასუხისმგებლო დეპარტამენტს ხელმძღვანელობდა.
ბათუმის მერის მოვალეობის შემსრულებელი, არჩილ ჩიქოვანი, თანამდებობაზე დანიშვნის შემდეგ, საკრებულოს წინაშე დღეს პირველად წარსდგა. თავის მოხსენებაში, განსაკუთრებული ყურადღება მიმდინარე ინფრასტრუქტურულ პროეტქებს დაუთმო და თქვა, რომ ძირითადი სამუშაოები ორ თვეში დასრულდება.
„ხელმისაწვდომი საცხოვრისი“-ს პროექტიც იმ ჩამონათვალში მოხვდა, რომელიც მერის მოვალეობის შემსრულებლის განცხადების მიხედვით, წლის ბოლომდე უნდა დასრულდეს.
სხდომა განსაკუთრებით ხმაურიანი იყო. ოპოზიცა არჩილ ჩიქოვანისგან პასუხებს და შეფასებებს როგორც მიმდინარე პროექტებზე, ისე ბოლო დროს, მერიაში განხორციელებულ ხმაურიან ცვლილებებზე სთხოვდა.
ჩიქოვანს დღევანდელ სხდომაზე „ნაციონალურმა მოძრაობამ“ წარსული თანამდებობებიც გაუხსენა. მათ შორის პერიოდი, როცა იგი აჭარაში სპეციალურ-ოპერატიულ დეპარტამენტს ხელმძღვანელობდა. შემდეგ კი შეკითხვებით მმართველ გუნდს მიმართა.
დღის წესრიგით გათვალისიწნებულ საკითხებზე საკრებულო მხოლოდ მას შემდეგ გადავიდა, როცა ოპოზიციამ ჩიქოვანთან შეკითხვები ამოწურა. კენჭი სულ 6 საკითხს უყარეს.