14, ივნისი 2017 17:02:00
„არა სიცოცხლე, არა სიკვდილი, არამედ რაღაც სხვა“ - ზურაბ გორგილაძის 80 წლის იუბილესადმი მიძღვნილი მუსიკალურ ლიტერატურული საღამო ბათუმის მუსიკალურ ცენტრში გაიმართა. სპექტაკლი რეჟისორმა ზაზა სიხარულიძემ ბათუმის დრამატული თეატრის მსახიობებთან ერთად დადგა, რომელშიც პოეტის განვლილი ცხოვრება წარმოაჩინეს. მთავარი როლი მსახიობმა მამუკა მანჯგალაძემ შეასრულა. სპექტაკლში მონაწილეობა ბათუმის დრამატული თეატრის მსახიობებთან ერთად, სახელმწიფო ანსამბლის მოცეკვავეებმაც მიიღეს. ზურაბ გორგილაძე მწერალთა კავშირისა და მემედ აბაშიძის პრემიერების ლაურეატი, ღირსების ორდენის კავალერი იყო. პოეტმა სიცოცხლეში 16 კრებული გამოსცა, მისი გარდაცვალების შემდეგ კი 3 წიგნი დაიბეჭდა.