14, ოქტომბერი 2020 21:20:00
მაშინ, როცა კრიტიკის ქარცეცხლში გახვეული ხელვაჩაურის მერი გინების გამო ბოდიშების მოხდითაა დაკავებული, მის მუნიციპალიტეტში პრობლემები უხვადაა. ჯუმბერ ვარდმანიძე ახლა წესით იმაზე უნდა ზრუნავდეს, რომ სოფელ ზედა ახალშენში ჯოჭოს ტრაგიკული სცენარი არ განმეორდეს. სურათი ასეთია: კობალაძეების ოჯახი მეწყერსაშიშ ზონაში ცხოვრობს. დანარჩენს რეპორტაჟიდან ნახავთ.
კიდევ ერთი ოჯახი ხელვაჩაურის მუნიციპალიტეტეში, სადაც შესაძლოა იგივე ტრაგედიის მომსწრეები გავხდეთ, რაც ორი კვირის წინ, სოფელ ჯოჭოში ვიხილეთ. მეწყრული პროცესების განვითარების მოლოდინში სოფელ ახალშენში, კობალაძეები უკვე წლებია ცხოვრობენ. საცხოვრებელთან მიმავალი გზა 2014 წელს დაზიანდა. განვითარდა მეწყრული პროცესი, შედეგად სავალ ნაწილზე ნაპრალები გაჩნდა და მიწა მცოცავი გახდა.
ოჯახი, გეოლოგიურ შემოწმებას, ხელვაჩაურის მუნიციპალიტეტში, ექვსი წელია ამაოდ ითხოვს. ხათუნა კობალაძე ფიქრობს, რომ მის წერილებს მერიაში არ კითხულობენ, წინააღმდეგ შემთხვევაში, უარყოფით პასუხს მაინც მიიღებდა.
იმის გამო, რომ დღეს სვეტიცხოვლობაა და უქმეა, ხელვაჩაურის მერიისთის ეს საპატიო არგუმენტი აღმოჩნდა იმისთვის, რომ ჩვენს შეკითხვებზე არ ეპასუხათ.