03, ნოემბერი 2020 21:15:00
მმართველი გუნდი კენჭისყრის პირველივე დღიდან, ვიდრე შედეგები გამოქვეყნდებოდა, მტკიცებით ფორმაში საუბრობდა, რომ არჩევნებს დამაჯერებლად მოიგებდნენ, თუმცა უსკო-ს ოფიციალური მონაცემების მიხედვით, აჭარაში არჩევნები ოპოზიციამ მოიგო. „ქართული ოცნების“ ოპონენტმა პოლიტიკურმა პარტიებმა ჯამში, 97 ათას 615-ი ადამიანის მხარდაჭერა მიიღეს. ბათუმის ოლქში ოპოზიციამ 12 ათას 227 ხმით მეტი მეტი მიიღო, ქობულეთის ოლქში 321-თ მეტი, ხოლო ხულო-ქედა-შუახევი-ხელვაჩაურის ოლქში 2 ათას 380 ხმით მეტი. მონაცემები ინტერნეტ-გამოცემა „ბათუმელებმა“ დათვალა.
„ქართული ოცნება“ ამ დრომდე გამარჯვებას ზეიმობს. ჯამში მმართველმა გუნდმა აჭარაში თითქმის 46 % მიიღო, რაც ჯამში 82 ათას 687 ხმაა. სახელისუფლებო ძალა მონაცემებით ყველა ოპოზიციურ პარტიაზე წინ დგას, თუმცა დღეს ამ მოცემულობას, ამ სიუჟეტით სხვა ჭრილში განვიხილავთ.
ივანიშვილის გუნდის ზეიმის მიუხედავად, აჭარაში ასეთი რეალობა გვაქვს: რეგიონში ჯამში 14 928 ხმით მეტი მიიღო მთლიანობაში ოპოზიციამ, ვიდრე არჩევნებში გამარჯვებულმა „ქართულმა ოცნებამ“. უსკო-ს ოფიციალური მონაცემების მიხედვით, ოპოზიციურ პოლიტიკურ პარტიებს ჯამში 97 615-მა ადამიანმა დაუჭირა მხარი ანუ 54,1%-მა ხოლო „ქართულ ოცნებას“ – 82 687-მა ,ანუ 45.9-მა . საკუთარი არჩევანი აქ სულ 180 302-მა ადამიანმა დააფიქსირა.
ამის მიუხევად კი ასეთ მოცემულობა გვაქვს: აჭარის უმაღლეს საბჭოში, კანონმდებლობის მიხედვით, მხოლოდ ქართული ოცნება და ერთიანი ნაციონალური მოძრაობა - გაერთიოანებული ოპოზიცია უნდა შევიდეს. ამომჩრეველთა უმეტესი ნაწილი მამრთველი გუნდის მიმართ კრიტიკულადაა განწყობილი, თუმცა ყველაზე მეტ მანდატს რეგიონის წარმომადგენლობით ორგანოში სწორედ ივანიშვილის პარტია მიიღებს.
აჭარის უმაღლეს საბჭოში მოსახვედრად 21 ოპოზიციური პარტია ცალ-ცალკე იბრძოდა. 5 პროცენტიანი ბარიერი კი მხოლოდ ერთიანმა ნაციონალურმა მოძრაობამ - გაერთიანებულმა ოპოზიციამ გადალახა. ანუ, ამ მოცემულობით ოპოზიცია ერთიანი რომ ყოფილიყო, არჩევნებსაც მოიგებდა და მანდატების უმრავლესობასაც ის მიიღებდა.
წელს საპარლამეტო არჩევნებში მოსახლეობის აქტივობა წინა წლებთან შედარებით გაზრდილი იყო. ანუ 2016 წელს თუკი მაჩვენებელი 52.97% იყო, წელს 59.12 % შეადგინა.