04, ნოემბერი 2020 18:00:00
31 ოქტომბრის არჩევნები რომ გაყალბდა, ამაზე სამოქალაქო საზოგადოება და ოპოზიცია ღიად საუბრობს. იმის მიუხედავად, ოპოზიამ ჯამში იმაზე მეტი ხმა მიიღო, ვიდრე მმართველმა ძალამ, ეს უკანასკნელი გამარჯვებას ზეიმობს. აჩევნებს არალეგიტიმურად სცნობს ოპოზიცია, შესაბამისად არც მეორე ტურს თანხმდება, არც პარლამენტში შესვლას აპირებს და მანდატებზეც უარს ამბობს. როგორ აფასებენ მოქალაქეები ამ გადაწყვეტილებას? აზრი ბათუმში მცხოვრებლებს ვკითხეთ.
მოსახლეობა მზად არის, საკუთარი ნების გამოსახატად, საარჩევნო ყუთთან კიდევ ერთხელ მივიდნენ. დარწმუნებული არიან, რომ არჩევნები გაყალბდა და საკუთარი ხმები მოპარეს. სურთ, კენჭისყრის შემდეგ, რეალური სურათი იხილონ.
ბათუმელებს გააზრებული აქვთ ქუჩაში გადმოტანილი პროტესტის არსი და მნიშვნელობაც, თუმცა, ყველაფრის მიუხედავად ფიქრობენ, რომ ბარიერგადალახულმა ოპოზიციურმა კანდიდატებმა, მანდატებზე უარი არ უნდა თქვან. უპრიანად მიაჩნიათ, სიმართლისთვის საკანონმდებლო ორგანოებიდან იბრძოლონ.
ერთპარტიული მმართველობა არც იმ ამომრჩეველს სურს, რომლებიც "ქართულ ოცნებას" უჭრენ მხარს. ფიქრობენ, რომ ხელისუფლებას ოპოზიცია უნდა ჰყავდეს, რათა განსხვავებულმა აზრმა იარსებოს, თუმცა რა აზრი აქვს სკამის შევსებას მაშინ, როცა უმრავლესობა ოპოზიციის აზრს თითქმის არასოდეს ითვალსიწინებს, პასუხი გაუჭირდათ.
რიგგარეშე არჩევნების არა, თუმცა არჩევნების მეორე ტურის მომხრე, ჩვენი რესპოდენტების აბსოლუტური უმრავლესობა აღმოჩნდა.