02, დეკემბერი 2020 21:59:00
"კორონავირუსი ბავშვებს არ ემართებათ“ - ეს იყო ფრაზა, რომელიც კოვიდ19-ის გავრცელების ფონზე საზოგადოებამ მალევე აიტაცა, თუმცა დღევანდელი რეალობა ამას არ ამართლებს. საქართველოში არასრულწლოვანთა ინფიცირებასთან ერთად, გარდაცვალების შემთხვევებიც ფიქსირდება. რამდენად რთული სამართავია კორონავირუსული ინფექციის მკურნალობა ბავშვებში და არის თუ არა მცირეწლოვნებში მკურნალობის განსხვავებული ტაქტიკა?
ტემპერატურა, თავის ტკივილი, გულისრევა, ხველა, დიარეა- ეს ის სიმპტომებია, რომელიც კორონავირუსს ბავშვებში და მოზრდილებში ახასიათებს. მკურნალობა პატარებში, ძირითადად იმაზეა დამოკიდებული, თუ რა მოცემულობა იქნება კონკრეტულ შემთხვევაში.
პედიატრის თქმით, კოვიდ დადებითი ბავშვების ჯანმრთელობის მდგომარეობა, ხშირ შემთხვევაში სტაბილურია. პროტოკოლის მიხედვით, იმ სპეციფიურ პრეპარატებს, რომლებიც მოზრდილებში გამოიყენება, პატარებს არ აწვდიან. მეთვალყურეობა ძირითადად ტემპერატურის და სატურაციის კონტროლს გულისხმობს.
იმ შემთხვევაში, თუ კი ბავშვი თანმდევი ქრონიკული დაავადების მატარებელი არ არის, მკურნალობას მხოლოდ თერაპიულ განყოფილებაში გადიან.
იმის გათვალისწინებით, რომ ახალი კორონავირუსი სეზონური გრიპისგან განსხვავებით, გაცილებით დიდხანს რჩება ორგანიზმში, მკურნალობის კურსიც უფრო ხანგრძლივია. სწორედ ამიტომ, ექიმები ამბობენ, რომ პატარებს განსაკუთრებული და განსხვავებული მიდგომები სჭირდებათ.
მშობლები ამბობენ, რომ მკურნალობის პერიოდში, ყველაზე რთული, პატარების ერთ სივრცეში დაყოვნებაა.
ბათუმის იაშვილის ახელობის დედათა და ბავშვთა კოვიდ კლინიკაში ამ ეტაპზე 65 პაციენტია მოთავსებული. მათგან 1 რეანიმაციულ განყოფილებაში. კლინიკაში, ბავშვებისთვის ცხელების ცენტრი 6 ნოემბერს გაიხსნა. დღემდე კი აქ, 294 პაციენტი გამოჯანმრთელდა და გაეწერა.