03, დეკემბერი 2020 21:15:00
ბოლო რამდენიმე კვირის განმავლობაში, საქართველოში, კორონავირუსი ანტირეკორდულ მაჩვენებლებს ამყარებს, თუმცა დღითიდღე იზრდება გამოჯანმრთელებულთა სტატისტიკაც. ბოლო მონაცემებით, ქვეყანა, 124 ათას 568 გამოჯანმრთელებულს ითვლის. მართალია მოქალაქეები უხილავ მტერს ამარცხებენ, თუმცა ხშირ შემთხვევაში, ისინი, კორონავირუსის დარჩენილ სიმპტომებს კვლავ უჩივიან. მაცნე დღეს რამდენიმე მათგანს გაესაუბრა. როგორც აღმოჩნდა, კოვიდ19-ისგან უკვე გამოჯანმრთელებულებს გემოსა და ყნოსვის შეგრძნება ისევ დაკარგული აქვთ.
ქეთევან ოქროპირიძე ერთ-ერთია, იმ ათობით ათას მოქალაქეს შორის, რომელმაც კორონავირუსი დაამარცხა. დიაგნოზის დადასტურების შემდეგ, 12 დღის განმავლობაში კოვიდსასტუმროში მკურნალობდა. საკარანტინე სივრცე დღეს დატოვა. ყვება, რომ სიმპტომები, რომლებიც კოვიდ19-ს ახასიათებს, ჯერ კიდევ აწუხებს. ამ დრომდე არ დაბრუნებია გემოსა და ყნოსვის შეგრძნება.
თითქმის ერთი თვე გავიდა მას შემდეგ, რაც ნიკა სოლომონიძე კორონავირუსით დაინფიცირდა. მიუხედავად იმისა, რომ უკვე გამოჯანმრთელებულია, ცხოვრების ჩვეულ რიტმს მაინც ვერ დაუბრუნდა. ისიც გემოსა და ყნოსვის დაქვეითებას უჩივის.
გემოს და ყნოსვის შეგრძნება სრულად არც მეგი მოისწრაფიშვილს დაბრუნებია, თუმცა ყველაზე მეტად რაც აწუხებს, ხშირი თავის ტკივილია. ამბობს, რომ კივიდ19-ით დაინფიცირებამდე თავი არასოდეს სტკიოდა.
რა კვალს ტოვებს კოვიდ19-ი ადამიანებში? ინფექციური პათოლოგიის, შიდსისა და ტუბერკულოზის ცენტრის დირექტორის განმარტებით, კორონავირუსი პირველ რიგში გავლენას სასუნთქ სისტემაზე ახდენს. თენგიზ ცერცვაძის თქმით, კოვიდინფექცია, კვალს, შესაძლოა, გულ-სისხლძარღვთა სისტემაზეც ტოვებდეს.
ახალი კორონავირუსისათვის დამახასიათებელი ჩივილები რომ გამოჯანმრთელების შემდეგაც შესაძლოა თვეობით დარჩეს, ექიმებიც საუბრობენ.
მედიკოსთა რეკომენდაციით, გამოჯანმრთელების შემდგომ, აუცილებელია აქტიური კონტაქტი იქონიოთ ოჯახის ექიმთან და ყურადღება მიაქციოთ ჯერ არ ალაგებულ მსუბუქ სიმპტომებს.