10, დეკემბერი 2020 21:30:00
თითქმის 9 თვეა, რაც სკოლამდელი აღზრდის დაწესებულებები დაკეტილია. მიუხედავად არაერთი მოთხოვნისა, ბაღებისთვის ამ დრომდე უცნობია როდის, ან რა ფორმით განახლდება სასწავლო პროცესი. განსაკუთრებით რთულ მდგომარეობაში კერძო სააღმზრდელო დაწესებულებები აღმოჩნდნენ. იმის გამო, რომ აღსაზრდელები აღარ დადიან, ბაღები შემოსავლის გარეშე დარჩნენ. ეს კი დიდი ფინანსური პრობლემების წინაშე აღმოჩენას ნიშნავს. მესაკუთრეებს ყველაზე მეტად საიჯარო გადასახადების გადახდა უჭირთ.
ბათუმის ნომერ პირველი საბავშვო აკადემია ერთ-ერთია იმ სააღმზრდელო დაწესებულებებიდან, რომელიც პანდემიის შედეგად დაიკეტა. უკვე 9 თვეა, რაც ბაღის 56 თანამშრომელი უხელფასო შვებულებაში იმყოფება.
პანდემიის პირველ ეტაპზე, ბაღებს მუშაობის უფლება პირველ ოქტომბრამდე ჰქონდათ შეზღუდული, ამიტომაც, ადმინისტრაცია მუსაობისთვის გასაგრძელებლად, საგანგებოდ მოემზადა. მოაწყო საიზოლაციო ოთახი, მთავრობის რეკომენდაციის შესაბამისად, შეიძინა სადეზინფექციო ხსნარები, თან 6 თვის მარაგი, შენობაში განათავსსა საინფორმაციო ბუკლეტები. აღმოჩნდა, რომ ხარჯი ტყუილად გაიღეს. ახლა ხელმძღვანელობას, საიჯარო ვალდებულების დაფარვაც უჭირს.
პრობლემები ანალოგიურია „ჩიკოშიც“. ბაღის დირექტორის ამბობს, რომ მეიჯარემ, იგი გადასახადისაგან არ გაათავისუფლა, რაც პანდემიის პირობებში, ეკონომიკურ მდგომარეობას კიდევ უფრო ამძიმებს.
მიუხედავად იმისა, „ვალდორფში" წლები გაატარა. სააღმზრდელო დაწესებულებების დაკეტვის შემდეგ, იძულებული გახდა ბაღიდან წამოსულიყო და ახალი სამსახური მოეძებნა. ცდა უშედეგო აღმოჩნდა. ახლა, ვეღარც ქირის ფულს იხდის.
როდის მიეცემათ სკოლამდელი აღზრდის დაწესებულებებს მუშაობის განახლების უფლება, ჯერ კიდევ უცნობია. კერძო სექტორში დასაქმებულებისთვის, ერთადაერთი საარსებო წყარო მთავრობის მიერ დაწესებული 200 ლარიანი კომპენსაციაა.