ბათუმის მერიის მრჩეველთა საბჭოს შეცვლილი შემადგენლობა და ახლად არჩეული თავმჯდომარე. მერის სათათბირო ორგანო 11-ის ნაცვლად, 14 წევრით დაკომპლექტდა. გუნდს კი, აჭარის განათლების სამინისტროს მოქმედი თანამშრომელი უხელმძღვანელებს. გაუჭირდება თუ არა კონტროლი თამარ გუდავას, არჩილ ჩიქოვანზე რიგი რჩევების მიცემისას? და ვინ ურჩია დანიშნული ბათუმის მერის მოვალეობის შემსრულებელს გუდავას კანდიდატურა? თეო ფუტკარაძე არკვევდა.
ქალაქისთვის საჭირბოროტო რიგ საკითხებზე რჩევებს ამიერიდან არჩილ ჩიქოვანს თამარ გუდავაც მიაწვდის. ბათუმის მერიის სამოქალაქო მრჩეველთა საბჭოს თავმჯდომარედ იგი ფარული კენჭისყრით უკვე არჩეულია.
გუდავა პარალელურად აჭარის განათლების სამინისტროს თანამშრომელია. იგი კულტურის დეპარტამენტის ხელმძღვანელია. ამას კანონი არ კრძალავს, თუმცა სწორედ ამიტომ, არასამთავრობო სექტორში ფიქრობენ, რომ რიგი რჩევების მიცემისას შესაძლოა მერიის საქმიანობაზე მას კონტროლი გაუჭირდეს.
ის, რომ მრჩეველთა საბჭო ორიენტირებული უნდა იყოს მოქალაქეთა ჩართულობაზე და ნაკლებად უნდა იყვნენ მასში წარმოდგენილნი საჯარო მოხელეები, მესამე სექტორის პოზიციას სრულად იზიარებენ თავად საბჭოს მოქმედი წევრები. ამბობენ, რომ მათი საქმიანობა, უწყებათაშორისი საკოორდინაციო საბჭოს საქმიანობას უფრო დაემსგავსება, ვიდრე სათათბირო ორგანოს.
საბჭოს თავმჯდომარედ, თამარ გუდავას კანდიდატურის შესახებ, წევრებმა კენჭისყრამდე ცოტა ხნით ადრე გაიგეს. პროცესს 14-დან 11 წევრი ესწრებოდა. მათგან, გუდავამ, 9 წევრის მხარდაჭრა მიიღო.
ვინ ურჩია მერს გუდავას კანდიდატურა, არჩილ ჩიქოვანმა დღეს არ გვიპასუხა. მისი პრეს-სამსახურის მიერ მოწოდებულ სინქრონში კი დანიშნული მერის მოვალეობის შემსრულებელი ამბობს, რომ შედეგით კმაყოფილია.
თავად თამარ გუდავა ფიქრობს, რომ ორ პოზიციაზე მუშაობა ხელს არც ერთ შემთხვევაში შეუშლის. მიუხედავად იმისა, გვარწმუებს, რომ შეთავაზება მოულოდნელი იყო, ამბობს, რომ უკვე ზუსტად იცის, რა სჭირდება ქალაქს და რა ტიპის რჩევებს მისცემს მერის მოვალეობის შემსრულებელს.
საბჭოს, ამ დრომდე არჩილ გუჩმანიძე ხელმძღვანელობდა. თავმჯდომარესთან ერთად, ნაწილობრივ შეიცვალა საბჭოს შემადგენლობაც. ახლა იგი 11-ის ნაცვლად, 14 წევრით დაკომპლექტდა.
1
s
s
s