პროტესტი შეჩერებულ მშენებლობას. ინვესტორის წინააღმდეგ ბათუმში, ანგისის 7 ნომერში მცხოვრებლები გამოვიდნენ. როგორც ამბობენ, ახალი კორპუსი რამდენიმე კვირაში უნდა ჩაბარდეთ, თუმცა ადგილზე ჯერ მხოლოდ საძირკველია ჩასხმული. არადა ხელშეკრულება 3 წლის წინ გააფორმეს. რატომ არ შეასრულა პირობა შპს "ქონსთრაქშენ დეველოფმენთმა"? თეო ფუტკარაძე არკვევდა.
ბინების მოლოდინით დაღლილი ადამიანები, დღეს ქუჩაში გამოვიდნენ. ახალ კორპუსში ახალი საცხოვრებლები 2021 წლის 15 იანვარს უნდა ჩაბარდეთ, თუმცა ანგისის 7 ნომერში ჯერ მხოლოდ საძირკველია ჩასხმული, არადა, მენაშენეებმა, ინვესტორთან ხელშეკრულება 2017 წელს გააფორმეს.
მრავალსართულიანი საცხოვრებლის ასაგებადი მშენებელმა ხიბაიების სახლი დაშალა. მოტყუებულ ოჯახს, ინვესტორი ბოლო რამდენიმე თვეა აღარც ქირას უხდის. 11 სულიანი ოჯახი, წინასაახალწლოდ ქუჩაში დარჩა.
მშენებლობას შპს "ქონსთრაქშენ დეველოფმენთი" ახორციელებს. ხიბაიების იურისტი ირწმუნება, რომ კომპანიას ხელს ადგილობრივი ხელისუფლება აფარებს. ისინი ახლა სანდო ინვესტორის შემოყვანას და მშენებლობის განახლებას ითხოვენ. საუბრობენ თაღლითურ სქემაზეც და საგამოძიებო უწყებას მიმართავენ.
კომპანიაში მოკლე სატელეფონო განმარტება გააკეთეს. დირექტორი, ნინო გოგინაშვილი ირწმუნება, რომ ბრალდება, თითქოს "ქონსთრაქშენ დეველოფმენთს" მერიაში მფარველობენ, უსაფუძვლოა. დებს პირობას, რომ მშენებლობა აუცილებლად გაგრძელდება, თუმცა როდის, კომპანიის ხელმძღვანელი ვერ აკონკრეტებს. რატომ არ შეასრულა პირობა, მენაშენეებს საკუთარ პრობლემებზე ესაუბრება.
ბათუმის მერიის მუნიციპალური ინსპექციის სამსახურიდან მხოლოდ წერილობითი განმარტება მივიღეთ. წერილში წერია, რომ მშენებელს რამდენიმე ჯარიმა დააკისრეს, სხვა მექანიზმების გამოყენება კი მათ კომპეტენციას სცდება.
247
s
s
s