აჭარის, 2021 წლის რესპუბლიკური ბიუჯეტის ასიგნებები, 2020 წლის საბოლოო გეგმასთან შედარებით, შემცირებულად არის დაგეგმილი. ნაკლებია იმ 3 ათას 334 მომუშავის შრომის ანაზღაურებისთვის გათვალისწინებული ხარჯიც, რომლებიც ხელფასს რეგიონის ბიუჯეტიდან იღებენ. მნიშვნელოვანი ფაქტია, რომ მიმდინარე წლის მთავარი ფინანსური დოკუმენტის თანახმად, დაგეგმილი შრომის ანაზღაურების ხარჯი მთლიანი ასიგნებები, 2020 წლის საბოლოო გეგმის ანალოგიურ მონაცემს აღემატება.
2021 წლის აჭარის რესპუბლიკური ბიუჯეტის თანახმად, დაგეგმილი შრომის ანაზღაურების ხარჯი მთლიანი ასიგნებების 11,73%-ს შეადგენს. მონაცემები „ფაქტ-ჩეკმა“ დათვალა. არასამთავრობო ორგანიზაციის კვლევის მიხედვით, მაჩვენებელი, გასული წლის საბოლოო გეგმის ანალოგიურ მონაცემს, 0.27%-ით აღემატება. 2020 წელს შრომის ანაზღაურებისთვის მთლიანი ასიგნებების 11,46% იყო გათვალისწინებული.
კვლევის ავტორი, იმ ქვეპროგრამებზე საუბრობს, სადაც შრომის ანაზღაურების ზრდა არის დაგეგმილი. ნაზი რეხვიაშვილის თქმით, დასაქმებულების ხელფასების გაზრდა „სასცენო და სამუსიკო ხელოვნების ხელშეწყობის“, ასევე „სკოლის გარეშე სასპორტო საგანმანათლებლო დაწესებულებების ხელშეწყობის“ ქვეპროგრამითაა დაგეგმილი. ანაზღაურება იზრდება როგორც 2020 წლის გეგმის პირვანდელ, ისე - საბოლოო ვარიანტთან მიმართებით.
მიუხედავად იმისა, რომ პანდემიით გამოწვეული რეალობიდან გამომდინარე, 2021 წლის რესპუბლიკური ბიუჯეტის გადასახდელები შემცირებულია, ორივე ქვეპროგრამით გათვალისწინებულია შრომის ანაზღაურების ზრდა. „სკოლის გარეშე სასპორტო საგანმანათლებლო დაწესებულებების ხელშეწყობის“ ქვეპროგრამა 206 მომუშავის ხელფასს ითვალისწინებს, ხოლო „სასცენო და სამუსიკო ხელოვნების ხელშეწყობის“ ქვეპროგრამიდან 779 მომუშავის შრომა ანაზღაურდება. გამოდის, რომ ერთი დასაქმებულის ანაზღაურება, პირველ შემთხვევაში, საშუალოდ, 480 ლარს, ხოლო მეორე შემთხვევაში, 700 ლარს აღემატება.
აჭარის განათლების სამინისტროში განმარტეს, რომ შრომის ანაზღაურების გაზრდა 2020 წლის იანვარში დაიგეგმა და მას პანდემიასთან არავითარი კავშირი აქვს. უწყების ცნობით, ხელფასების გაცემა გასული წლის ოქტომბერში დაიწყო და წელსაც გაგრძელდება.
აჭარის განათლების სამინისტროში ამბობენ, რომ 2020 წლის ბიუჯეტში ცენტრალური აპარატის სახელფასო ფონდი მილიონ 620 ათასი ლარი იყო. უწყების მტკიცებით, 2021 წლის მთავარ ფინანსურ დოკუმენტშიც რაოდენობა უცვლელია.
14
s
s
s