29, იანვარი 2021 21:30:00
"იმოქმედე" , "არ დათმო", " საქართველოს ბურჯი" - ეს იმ სამოქალაქო აქტივისტთა ახალგაზრდული ჯგუფების ჩამონათვალია, რომლებიც 31 ოქტომბრის არჩევნების შემდეგ შეიქმნა. ისინი ოპოზიციურ პარტიებთან ერთად ბოიკოტს საპარლამენტო არჩევნების შედეგებს უცხადებენ. გარდა იმისა, რომ ჩართულები არიან პოლიტიკურ აქტივობებში, ახალგაზრდები საკუთარი სახსრებით ხშირად სოციალურად დაუცველ ოჯახებს ეხმარებინ. ჩემი კოლეგა გიამბობთ.
„იმოქმედე“ ერთ-ერთი ყველაზე ახალგაზრდა აქტივისტთა ჯგუფია, რომელიც ბათუმში დაარსდა. დამაარსებლებიც ახალგარდები არიან. გუნდი მაშინ შეიკრიბა, როცა არჩევნების შედეგებს საზოგადოების ნაწილმა უნდობლობა გამოუცხადა და ქუჩაში გამოვიდა. მათი მიზანი, მხოლოდ რიგგარეშე არჩევნების მიღწევა არ არის. ეწევიან ქველმოქმედებასაც. ცდილობენ მშიერი მოსახლეობა დააპურონ.
„საქართველოს ბურჯი“ - ასე ჰქვია კიდევ ერთ საინიციატვო ჯგუფს, რომელიც სულ რამდენიმე დღის წინ დაკომპლექტდა. ოფისი ე.წ. „თავისუფლების კვარტალში“ აქვთ. მათი მთავარი საზრუნავი, პანდემიის შედეგად, უმუშევრად დარჩენილი მოქალაქეების მხარდაჭერაა.
„არდათმო“ - კიდევ ერთი ორგანიზაციაა ბათუმში, თუმცა ბევრისგან განსხვავებით მათ ქალაქში კარგად იცნობენ. კონკრეტული მიმართულება არ აქვთ. არიან და იბრძვიან იქ, სადაც ქვეყნისა და ქალაქისათვის მნიშვნელოვანი საკითხები წყდება. შეხვდებით იქ, სადაც ძეგლებს ხელყოფენ, სადაც უკანონოდ ანგრევენ ან აშენებენ, სადაც შიმშილობენ და პასუხისმგებლობას არავინ იღებს.
ყველა ეს ორგანიზაცია, ქველმოქმედებას საკუთარი სახსრებით ეწევა, რაც საკმაოდ მწირია, ამიტომაც, გეგმავენ საგრანტო განაცხადები შეავსონ და მეტი მხარდამჭერი პროგრამები განახორციელონ.