ზეთი, შაქარი, ფქვილი და ბოსტნეული - ეს არასრული ჩამონათვალია იმ პროდუქტებისა, რომელიც ყოველდღიურად ძვირდება. ფასების ზრდაზე ღიად საუბრობენ აგრარული ბაზრის მოვაჭრეები. გაძვირებული სურსათი, მოსახლეობის უკმაყოფილებასაც იწვევს, რის გამოც ბაზრის დახლები მომხარებლებისგან დაცალიერელდა. იმპორტირებულ საქონელთან ერთად, ფასნამატი ადგილობრივი წარმოების პროდუქტებზეც შეინიშნება.
გაძვირებული პროდუქტით ისედაც უკმაყოფილო მოვაჭრეები და მომხმარებლები დღეს კიდევ უფრო შეძრწუნებული არიან. სურსათზე, ფასები, გასულ თვესთან შედარებით, კიდევ უფრო გაიზარდა. ბაზრმა მომხმარებელი, ფაქტობრივად დაკარგა.
5 ლიტრიანი ქილით, ზეთის ფასი 26 ლარია. ბოლო რამდენიმე კვირის მანძილზე, ღირებულება შვიდი ლარით გაიზარდა. პურის ფასი კი, საცალოდ, 80 თეთრიდან 1 ლარამდე აღწევს. ერთი თვის წინ არსებულ ღირებულებას, ბევრად აჭარბებს ნიორისა და ხახვის ფასიც.
მოვაჭრეების თქმით, ლარის გაუფასურების პარალელურად, ბოლო ერთ თვეში ფასების ზრდა, კოვიდპანდემიის გამო შემოღებულმა რეგულაციებმაც განაპირობა. დაკეტილი რესტორნებისა და სხვა კვების ობიექტების მუშაობის შეჩერებამ, საგრძნობლად იმოქმედა პროდუქტის რეალიზებაზე.
მოვაჭრეების არგუმენტებს ამყარებენ ეკონომისტებიც. სალომე დეისაძის თქმით, ის პროდუქტები, რომლებზეც მაღალი ფასნამატია, ძირითადად იმპორტირებულია, რაც ასევე პანდემიას უკავშირდება. იმისათვის, რომ ეკონომიკის დაღმასვლა არ გაგრძელდეს და პროდუქტებზე, მინიმუმ, ფასების სტაბილური შენარჩუნება მოხდეს, სპეციალისტები გამოსავალს ადგილობრივი წარმოების გაზრდის ხელშეწყობაში ხედავენ.
საქართველოს სტატისტიკის ეროვნული სამსახურის ცნობით, 2021 წლის იანვარში, წინა თვესთან შედარებით, ინფლაციის დონე 1.1 %, ხოლო წლიური ინფლაციის დონე 2.8 % -ია. საქსტატის მიხედვით, ყოველთვიური ინფლაციის მაჩვენებელზე, ძირითადი გავლენა იქონია ფასის მატებამ სურსათსა და უალკოჰოლო სასმელებზე.
69
s
s
s