09, თებერვალი 2021 17:59:00
ე. წ ხოფის ბაზრობაზე გაჩენილი ხანზარი ამ დროისთვის ლიკვიდირებულია. დაკვამლიანების შედეგად ტანსაცმლის მაღაზია დაიწვა. ხანძრის გამომწვევი მიზეზები ამ დრომდე უცნობია. ცეცხლი მეხანძრე მაშველებმა მალევე ჩააქრეს, თუმცა წყლის ძლიერი ჭავლის შედეგად, გვერდით მდებარე მაღაზიაც დაზიანდა. რა დახმარებას გაუწევს დაზარალებულებს ბათუმის მერია?
ხოფის ბაზრობაზე, დაკვამლიანება დღის 11 საათზე დაწყო, ცეცხლი ტანსაცმლის მაღაზიას გაუჩნდა. ხანძარმა სრულად გაანადგურა გასაყიდი საქონელი. შედეგად არავინ დაშავებულა.
დაკვამლიანება მოვაჭრეებმა შენიშნეს. მათ, არ აქვთ ინფორმაცია, რა გახდა ხანძრის გამომწვევი მიზეზი.
მაღაზიაში გაჩენილ ხანძარს, შვიდი სახანძრო-სამაშველო ჯგუფი აქრობდა.
ცეცხლის ლიკვიდირებისას, წყლის ძლიერი ჭავლის შედეგად, დაზიანდა გვერდით არსებული მაღაზიაც.
რას შეეძლო მოულოდნელად ცეცხლის გაჩენა, სავარაუდო მიზეზის დასახელება უჭირთ ე.წ. ხოფის ბაზრის ადმინისტრაციაშიც, თუმცა, დირექტორი დარწმუნებულია, რომ აალება ელექტროსადენებიდან არ დაიწყებოდა.
ზარალის ზუსტი ოდენობა ჯერ ცნობილი არ არის. ბათუმის მერიაში აცხადებენ, რომ მხოლოდ ზარალის დათვლის შემდეგ გადაწყდება, რა სახით დაეხმარება მერია, მაღაზიის მფლობელებს.
შინაგან საქმეთა სამინისტრომ გამოძიება უკვე დაიწყო.