თითქმის 1 წელია მსოფლიო და მათ შორის საქართველოც უხილავ მტერს ებრძვის. ალბათ, ყველა ვთანხმდებით, რომ ამ ფრონტში პირველ ხაზზე ჯანდაცვის სფეროს წარმომადგენლები დგანან. კარგი თუ ცუდი, მთავრობას კოვიდის მართვის საკუთარი ხედვა აქვს, თუმცა დღემდე ვერ შეძლო ქვეყანაში ვაქცინის შემოტანა. უფრო მეტიც, „ქართულ ოცნებას“ არც იმაზე ფიქრი დაუწყია, რომ აცრის აუცილებლობაში მოქალაქეები დაერწმუნებინა.
ანტივაქსერული განწყობები მხოლოდ ქუჩაში არ არის. სოციალურ ქსელებშიც მრავლად არიან ადამიანები, რომლებიც კოვიდ 19-თან ბრძოლის ამ ფორმას სხვადასხვა მიზეზით ეწინააღმდეგებიან. აცრა და რისკფაქტორები“, „არა სავალდებულო აცრებს“, „აცრებით დაზარალებულთა ჯგუფი“- ასეთ ფეისბუქგვერდებს ათასობით გამომწერი ჰყავს.
ამ განწყობების ფონზე, ღირს გახსენება, რა თქვა ქვეყნის მთავარმა ეპიდემიოლოგმა სულ რაღაც 2 თვის წინ. ამირან გამყრელიძემ 15 იანვარს დარწმუნებით განაცხადა, რომ მოსახლეობის დაახლოებით 50-60 % აცრაზე თანახმაა. კიდევ ერთი დეტალი: დაავადებათა კონტროლის ეროვნული ცენტრის ხელმძღვანელმა ისიც დასძინა, რომ გამოკითხვა ჯანმოს მეთოდით ჩატარდა.
ჩვენს მიერ ჩაწერილი ინტერვიუებიც რომ არა, ჯანმოს მეთოდით ჩატარებულ ციფრებთან წინააღმდეგობაში, და საკმაოდ დიდ წინააღმდეგობაში მოდის NDI-ს გამოკითხვის შედეგები. ეროვნულ დემოკრატიულ ინსტიტუტმა კითხვით მოსახლეობას ორჯერ მიმართა, 2020 წლის ივნისში და ნახევარი წლის შემდეგ დეკემბერში. პროცენტული მაჩვენებელი ასე გადანაწილდა: ივნისსში აცრაზე თუკი 38 პროცენტი იყო თანახმა, დეკემბერში უარი 41-მა პროცენტმა არ თქვა. ანუ სხვაობა 3 პროცენტია. გამოდის, მთავრობამ სკეპტიკური განწყობების შესაცვლელად, ფაქტობრივად ვერაფერი გააკეთა.
მსოფლიო პანდემიის ფონზე ვირუსის დასამარცხებლად აცრის მიმართ ნდობის გაზრდა, პირდაპირი მნიშვნელობით სასიცოცხლოდ მნიშვნელოვანია. როგორ, რა ფორმით და რა ღონისძიებებით აკეთებდა ამას აჭარის ჯანდაცვის სამინისტრო? - კითხვების დასმის შესაძლებლობა არ მოგვეცა. უწყებაში სატელევიზიო კომენტარზე უარი გვითხრეს, მხოლოდ სიტყვიერად განგვიმარტეს, რომ ვაქცინის შემოტანამდე, კამპანიის დაწყება არც ღირდა.
სამაგიეროდ პრობლემაზე ღიად საუბრობენ ოპოზიციაში. „ერთიანი ნაციონალური მოძრაობის“ წევრი ამბობს, რომ მოსახლეობის სკეპტიკური განწყობის შესაცვლელად ხელისუფლებამ არაფერი გააკეთა. არადა ვაქცინაცია საუკუნეების განმავლობაში კაცობრიობას ისეთი დაავადებების წინააღმდეგ იმუნიტეტის გამომუშავებაში დაეხმარა, როგორებიცაა წითელა, წითურა, ყბაყურა, ტუბერკულიოზი, ტეტანუსი.
რა მიზეზებით იკავებენ თავს საქართველოში აცრისგან ან რას ეფუძნება ეჭვები? ჯანდაცვის ექსპერტი ამბობს, რომ სკეტპიციზმის მიზეზი ვაქცინის იგრგვლივ არსებული ბუნდოვანებაა, რომელიც საზოგადოებაში მისი უსაფრთხოების შესახებ კითხვით ნიშნებს აჩენს.
ვაქცინაციის პროცესის სამართავად შემქნილი ეროვნული გეგმის მიხედვით, მოსახლეობის 60%-ის აცრა ქვეყანას 170 მილიონი ლარი დაუჯდება. ვიცით ისიც, რომ აცრას ყველა სრულწლოვანი მოქალაქე უნდა დაექვემდებაროს. თუმცა NDI-სა და ჯანდაცვის სისტემის მიერ მზაობის შესახებ ჩატარებულ გამოკითხვის შედეგებს ერთმანეთს თუ შევადარებთ, ფაქტია, ხელისუფლებას ოპტიმისტური განწყობები აქვს. ალბათ ამიტომაცაა, რომ ჯანდაცვის მინისტრი, ვირუსთან ბრძოლაში საკუთარ უწყებას 5-ანს უწერს.