„ბათუმის ბულვარის“ დირექტორის სამართლიანი და ამავდროულად სკანდალური განცხადება. ირაკლი ჯინჭარაძის ხმაურიანი გამოსვლა ბათუმის საკრებულოს სხდომაზე დღეს საზოგადოებისა და მედიის ყურადღების ცენტრში მოექცა და დღის თემა გახდა. არადა მას განსაკუთრებული არაფერი უთქვამს, ხმამაღლა, გაბრაზებულმა დააფიქსირა, რომ ბათუმის ბულვარი საჯაროა, ხალხისაა და ზღვისპირა ზოლი იჯარით კერძო კომპანიებზე არ უნდა გაიცეს. საჯარო მოხელე იმდენად გამბედავი აღმოჩნდა, რომ დღეს საკრებულოს სხდომა პროტესტის ნიშნადაც დატოვა. ემოციური იყო მისი სიტყვები წარმომადგენლობითი ორგანოს შენობიდან გასვლის შემდეგაც. მართლია ჯინჭარაძემ ხაზგახმით აღნიშნა, რომ ოპოზიცია არ არის და არავის ეწინააღმდეგება, თუმცა როგორ გაიგებს ოცნების გუნდი მისი მენეჯერული და მოქალაქეობრივი ვალდებულების კონტექტს, როგორც ეს თავად ახსნა, დროის ამბავია და ყველა ერთად ვიხილავთ. დარჩება თუ არა ბულვარი საჯარო და შეინარჩუნებს თუ არა თანამდებობრივ სავარძელს ზღვისპირა პარკის ხელმძღვანელი? მთავარი კითხვები ახლა ასე ჟღერს. ბათუმის საკრებულოს სხდომა დღეს იმდენად ხმაურიანი იყო, რომ ფიზიკური დაპირისპირებების შედეგად ერთი პირი დააკავეს.
„ბათუმის ბულვარის“ დირექტორის ხმაურიანი განცხადება საკრებულოს სხდომაზე ყველასთვის მოულოდნელი აღმოჩნდა. ირაკლი ჯინჭარაძემ ამ ფორმით წინააღმდეგობა პლაჟის გასხვისებას გაუწია. ზღვისპირა პარკის ხელმძღვანელმა ხმამაღლა დააფიქსირა, რომ „ლე მერიდიანს“ 15 წლიანი ვადით სანაპიროს კონკრეტული მონაკვეთი არ უნდა გადაეცეს. შეინარჩუნებს თუ არა ჯინჭარაძე თანამდებობას სამართლიანი, თუმცა სკანდალური განცხადების შემდეგ- ამას დრო აჩვენებს.
ხმაურიანი განცხადებებისა და სიტყვიერი დაპირისპირებების შგამო ბათუმის საკრებულოს შემადგენლობა იძულებული გახდა, რომ პლაჟის იჯარით გადაცემის საკითხი, დღის წესრიგიდან ამოეღო. წარმომადგენლობითი ორგანოს თავმჯდომარის განმარტებით, თემაზე ბულვარის განაშენიანების გეგმის დამტკიცების დროს იმსჯელებენ.
საკითხის დღის წესრიგიდან ამოღებას სამოქალაქო აქტივისტები მიესალმებიან, თუმცა ბათუმის ბულვარში მიმდინარე მშენებლობები არ მოსწონთ. ამბობენ, რომ თუ კი საკითხი სამომავლოდ, დადებითად გადაწყდება, ეს კულტურული მემკვიდრეობის ძეგლს დიდ ზიანს მიაყენებს.
„ჩემთვის მნიშვნელოვანია საკითხი კანონის შესაბამისად გადაწყდეს, ისე, რომ მოქალაქეების ინტერესები არ დაზიანდეს“ - ამბობს დანიშნული ბათუმის მერის მოვალეობის შემსრულებელი. არჩილ ჩიქოვანის მტკიცებით, საკითხის ინიციატორი გაფრთხილებული იყო, რომ ბულვარის განაშენიანების კონცეფციასთან თანხვედრაში ყოფილიყო .
სხდომაზე დასწრების უფლებას ითხოვდნენ სამოქალაქო აქტივისტები და არასამთავრობო ორგანიზაციის წევრები. სამართალდამცველების წინააღმდეგობის მიუხედავად , მათ მეორე სართულზე ასვლა სცადეს. იყო სიტყვიერი დაპირისპირება.
დაპირისპირება იყო სხდომათა დარბაზშიც. ოპოზიცია, საკრებულოს თავმჯდომარეს მოქალაქეების სხდომაზე დასწრებისაკენ მოუწოდებდა.
სასტუმრო „ლე მერიდიანის“ მფლობელი კომპანია, ბულვარის გასწვრივ, 3 ათას 500-მდე კვადრატულ მეტრ ტერიტორიას გრძელვადიანი იჯარით ითხოვს. განკარგულების პროექტის მიხედვით, ყოველი წლის 4 თვის საიჯარო ქირის სახით, „ბათუმი თაუერმა“ 80 ათასამდე ლარი უნდა გადაიხადოს.