„ცოცხების აქცია“ „ერთიანი ნაციონალური მოძრაობის“ ოფისთან. „ქართული ოცნების“ მხარდამჭერებმა, ოპონენტებს პარტიული ოფისის შენობაზე, გია ვოლსკის გამოსახულებით, სტიკერების მიკვრა არ შეარჩინეს. ნაცმოძრაობის ოფისთან ისინი ასევე სტიკერებით და კვერცხებით მივიდნენ. კონტრპროტესტი სიტყვიერ და ფიზიკურ დაპირისპირებაში გადიზარდა. ვინ მონაწილეობდა ცოცხების აქციაში?
ოპოზიციური პარტიის ოფისზე თავდამსხმელთა სია გაშიფრულია. აქციის მონაწილეთა სახელ-გვარები „ერთიან ნაციონალურ მოძრაობაში“ გაასაჯაროვეს. გიორგი კირთაძის განცხადებით, დიდი ნაწილი საჯარო დაწესებულებებსა და საბიუჯეტო ორგანიზაციებში მუშაობს, ხელფასებს კი ბიუჯეტის ფულით უხდიან. ხელისუფლების ოპონენტის თქმით, პროტესტის რადიკალური ფორმა ოცნების გუნდმა წაახალისა. ამბობს, რომ ბრძოლის ეს ხერხი-მოღალატეების ძახილი და მუქარა მმართველი გუნდის სტილია.
სიას გაგრძელებაც აქვს, ამაზე ცოტა ქვევით გეტყვით. მანამდე კი აღნიშვნის ღირსია, რომ ტერორისთვის გამოყენებულ საჯარო მოხელეთა შორის, ბათუმის ბოტანიკური ბაღის , ერთ-ერთი განყოფილების უფროსია. როგორ აღმოჩნდა გურამ დუაძე მმართველი გუნდის ოპონენტების წინააღმდეგ, რადიკალური მეთოდებით მებრძოლთა შორის? მან ჩვენს სატელეფონო ზარებს დღეს არ უპასუხა. კონტაქტზე ვერც სხვა დანარჩენებთან გავედით, ვერც ანზორ დავითაძესთან, ვერც კობა ცინცაძესთან, ვერც გალაქტიონ ორმოცაძესთან, ვერც ზურაბ წულაძესთან, ვერც ზურაბ ვარშანიძესთან, ვერც გოჩა ბარამიძესთან. პრემსამსახურების თანამშრომლებმა: ნაწილმა - ინტერვიუ არ შეგვითანხმა, ნაწილმა კი-საჯარო მოხელეების ტელეფონის ნომრები, იმ მოტივით არ მოგვცა, რომ ეს პერსონალური ინფორმაციააო.. მოკლედ, დღეს მედიას ყველა ის პირი დაემალა, ვინც გუშინ ღიად ესხმოდა თავს ოცნების ოპოზიციას.
„ბათუმის ავტოტრანსპორტში“ დაასაქმებულმა გიორგი გიორგაძემ მმართველი გუნდის მიმართ სიმპატია და ოპოზიციის მიმართ აგრესიული დამოკიდებულება ერთ ცოცხზე ვერ დაატია. აქციის მსვლელობაში აქტიურად ჩართული მერიის ეს თანამშრომელი, გუშინდელი დღისგან განსხვავებით, დღეს კამერების წინ საკმაორდ მოკრძალებული აღმოჩნდა. თქვა, რომ მედიასთან სათქმელი არაფერი აქვს, უფრო მეტიც, სუბიექტურობა დაგვწამა. გიორგაძემ სატელეფონო საუბარში გვითხრა, რომ მიკერძოებული ტელევიზია ვართ და TV 25-ის კითხვებზე პასუხების გაცემა არ სურს. ცნობისთვის, გიორგაძე ფეისბუქზე მუდმივად აზიარებს ოცნების გუნდის მხარდამჭერ პოსტებს და ოპოზიციის დისკრედიტაციას ეწევა.
იმ საჯარო მოხელეებს შორის, რომლებიც გუშინ ოპოზიციის ოფისს თავს ესხმოდა და ხელფასს ბიუჯეტიდან ვუხდით, ერთ-ერთი, დათო კობახიძეა. სხვების მსგავსად, არც მან უპასუხა ჩვენს სატელეფონო ზარებს. სოციალურ ქსელში კობახიძე ხშირად აქვეყნებს ფოტოებს „ქართული ოცნების“ მაღალჩინოსნებთან: თორნიკე რიჟვაძესთან,რესან კონცელიძესთან, ტიტე აროშიძესთან, ზაალ მიქელაძესთან.
კიდევ ერთი საჯარო მოხელე, ვინც ვოლსკის ამ ჟესტზე პროტესტს პასუხი გუშინდელი ქმედებით გასცა, მანუჩარ რიჟვაძეა. იგი თორნიკე რიჟვაძის ბიძაშვილია. სოციალურ ქსელში მთავრობის თავმჯდომარის საპიარო პოსტებს მუდმივად აზიარებს. ვცადეთ მასთან გასაუბრებაც. გვითხრა, რომ ჩვენთვის დრო არ აქვს და მარტივად, ახსნა-განმარტებების გარეშე დაგვემშვიდობა.
საჯარო მოხელეებმა დუმილი არჩიეს. ის, ვინც მედიის კითხვებზე პასუხების გაცემა არ დაიზარა, „ქართული ოცნების“ აქტიური მხარდამჭერი გაბრიელ კამაევია. ამბობს, რომ აქცია მმართველი გუნდის წახალისებული არ ყოფილა და არც დაკვეთას ასრულებდა. ამართლებს ყველას, ოპოზიციის გარდა. მიიჩნევს, რომ „ნაციონალურმა მოძრაობამ“ დამსახურებული პასუხი მიიღო.
მომხდარს აკრიტიკებენ პარტიაში „ ლელო საქართველოსთვის“. გენადი თებიძის თქმით, რეიდი საჯარო მოხელეებმა განახორციელეს. ოპოზიციის წევრი თორნიკე რიჟვაძეს მიმართავს.
ადგილობრივი ხელისუფლება დუმს, კომენტირებას საჭიროდ არ თვლის არც თორნიკე რიჟვაძე. ცენტრალურ ხელისუფლებაში კი განაცხადეს, რომ ძალადობა და აგრესია მმართველი გუნდის სტილი არ არის .
ტერორისთვის გამოყენებული საჯარო მოხელეების ქმედება, რომლებიც რადიკალური მეთოდებით იბრძოდნენ ოპოზიციის წინააღმდეგ, მოიწონა“ქართული ოცნების“ დეპუტატმა და პოლიტსაბჭოს წევრმა. დიტო სამხარაძემ მხარდაჭერებს სოციალური ქსელით მადლობა გადაუხადა.
6
s
s
s