07, აპრილი 2021 21:58:00
გამოძიება, გამომწვევ მიზეზებზე უკვე მუშაობს. უბედურ შემთხვევას ერთი ადამიანის სოცოცხლე ემსხვერპლა, ოთხი კი მძიმედ დაშავდა. ხელოსნები მუშაობდნენ, რა დროსაც მშენებარე კერძო საცხოვრებელი სახლის ორივე სართული დაინგრა. შემთხვევა, ბათუმში, ურეხის დასახლებაში, შაინიძის ქუჩაზე მოხდა. ნინია მესხიძე იმყოფებოდა ადგილზე.
უბედური შემთხვევა, ურეხის დასახლებაში, დღეს, დაახლოებით 2 საათზე მოხდა. შედეგად, 1 ადამიანი გარდაიცვალა, 4 კი დაშავდა. ცხედარი, მაშველებმა, რამდენიმე საათიანი ძებნის შემდეგ ნანგრევებიდან, ამოიყვანეს.
არსებული ინფორმაციით, გარდაცვლილი კაცი, ოჯახის ახლობელი იყო. იგი, ნათესავებს სამშენებლო სამუშაოებში ეხმარებოდა. საცხოვრებელზე მეორე სართულს აშენებდნენ, რა დროსაც შენობა ჩამოინგრა. რა გახდა შემთხვევის გამომწვევი მიზეზი, გამოძიება დაადგენს.
რაც შეეხება დაშავებულებს, 3 მათგანი ბათუმის სამედიცინო ცენტრში მოათავსეს. გადაუდებელი დახმარების დეპარტამენტის ხელმძღვანელის განმარტებით, 1-ის ჯანმრთელობის მდგომარეობა მძიმეა. მეოთხე დაშავებული კი, კლინიკა „მედინაში“ იმყოფება.
იმის გამო, რომ დაზარალებულები ადგილობრივები არ არიან, ბათუმის მერიაში მომხდარზე პასუხისმგებლობას არ იღებენ. ფაქტზე გამოძიება, საქართველოს სისხლის სამართლის კოდექსის 240-ე მუხლით დაიწყო, რაც სამშენებლო სამუშაოების წარმოებისას უსაფრთხოების წესის დარღვევას გულისხმობს.