როგორ იდევნება კრიტიკული მედია საქართველოში. ტელეკომპანია "ფორმულას" თანამშრომლებს თავს დაესხნენ. მაუწყებლის ინფორმაციით, ერთ-ერთ მათგანს ფიზიკურად გაუსწორდნენ, მეორეს კი მანქანა დაუმტვრიეს. არის თუ არა აგრესია წახალისებული სახელისუფლებო გუნდის მიერ ?
არჩილ ტიბუნაშვილი თავდასხმის დეტალებს იხსენებს და ამბობს, რომ გამოძიებასთან თანამშრომლობისთვის მზადაა. ფიზიკური ანგარიშწორების გარდა, თავდამსხმელმა ტელეკომპანიის ავტომობილიც დააზიანა. ჩამსხვრეულია მანქანის მინები. მაუწყებლის თანამშრომელი მომხდარს კრიტიკულ მედიასაშუალებაში მუშაობას უკავშირებს.
ნაცემია ტელეკომპანიის კიდევ ერთი მძღოლი, რომელსაც სხეულზე ფიზიკური დაზიანებები აღენიშნება. მაუწყებლის წარმომადგენელების თქმით, დაზარალებულმა ბრიფინგამდე რამდენიმე წუთით ადრე მისი და მისი ოჯახის უსაფრთხოებიდან გამომდინარე ვინაობის გასაჯაროება არ ისურვა. „ფორმულას“ გენერალური დირექტორის, ზუკა გუმბარიძის განცხადებით, თანამშრომლებზე თავდასხმა ქვეყანაში არსებული პოლარიზაციისა და ძალადობრივი ფონის გაგრძელებაა.
ტელეკომპანია „ფორმულას“ გენერალური დირექტორის მოადგილის, გიორგი თარგამაძის განცხადებით, არსებობს გარკვეული მტკიცებულებები იმის შესახებ, რომ ტელევიზიის თანამშრომლებზე თავდასხმა სახელისუფლებო სტრუქტურების მიერაა წახალისებული. როგორც თარგამაძემ ტელევიზიაში გამართულ საგანგებო ბრიფინგზე თქვა, ყველა ასეთი შემთხვევა უნდა იყოს გამოძიებული, ხოლო დამნაშავეები - დასჯილი.
საქართველოს ჟურნალისტური ეთიკის ქარტია ტელეკომპანია ფორმულას თანამშრომლებზე თავდასხმას ოფიციალური განცხადებით გამოეხმაურა. ორგანიზაცია მოუწოდებს შინაგან საქმეთა სამინიტროს, დროულად გამოიძიოს აღნიშნული ფაქტი. შეგახსენებთ, ეს პირველი შემთხვევა არ არის, როდესაც ტელეკომპანია „ფორმულას“ თანამშრომლებს თავს ესხმიან. თებერვალში თავს დაესხნენ ჟურნალისტ ვახო სანაიასა და მის ოჯახს. ტელეწამყვანმა მომხდარი მაშინ მის ჟურნალისტურ საქმიანობას დაუკავშირა.
73
s
s
s