სამოქალაქო აქტივიზმში გადასული ბათუმის ბულვარის ყოფილი დირექტრის მხარდასაჭერად დღეს მორიგი აქცია მოეწყო. საჯაროდ გამოხატული კრიტიკული აზრის გამო დასჯილ დირექტორს, რიგით ბათუმელებთან ერთად, მხარდაჭრა არასამთავრობო ორგანიზაციებმაც გამოუცხადეს. უცვლელი, თუმცა ღიად დარჩენილი შეკითხვები. რა ხდებოდა აქციაზე, ია გოლიაძე გვიამბობს.
ირაკლი ჯინჭარაძეს მთავრობის სახლთან შეკრებილებმა ტაში დღეს ბევრჯერ დაუკრეს. ზღვისპირა პარკის ყოფილმა დირექტორმა მხარდამჭერებთან და ბულვარის დამცველებთან ერთად ხელისუფლებას რამდენიმე კითხვით მიმართა. პირველი, რაც ყოფილმა ხელმძღვანელმა ეჭვქვეშ დააყენა - მისი გათავისუფლების მიზეზის ტელევიზიით გავრცელების ფაქტი იყო. ჯინჭარაძეს უკვირს, ვინ მიაწოდა საზოგადოებრივ მაუწყებელს მისი გათავისუფლების ბრძანების დეტალები.
140 წლიანი ბაღის ისტორიაში რომ საკუთარი კვალი დატოვა, ეს დღესაც გაიმეორა. გაიმეორა ისიც, რომ ბულვარის დასაცავად ბრძოლას სამოქალაქო აქტივიზმით გააგრძელებს. თქვა ისიც, რომ კულტურული მემკვიდრეობის ძეგლის სტატუსის მქონე ზღისპირა პარკი, რომელიც ქვეყნის მთავარ რეკრეაციულ ზონას წარმოადგენს, ადგილობრივი ხელისუფლების პირად ინტერესებს ეწირება. აქ კი პირდაპირ თორნიკე რიჟვაძე დაასახელა.
შეკრებილები პარკის ყოფილი ხელმძღვანელის ინტერესებს სრულად იზიარებენ. ამბობენ, რომ ბულვარი ხალხისაა და ხალხს უნდა დარჩეს. არასამთავროვრობო ორგანიზაციების წარმომადგნელებმა, აქტივისტებმა და რიგითმა მოქალაქეებმა ტრანსფარანტები მიიტანეს, წარწერით „ საქართველო ოკუპირებულია ქართული ოცნების მიერ“
ჯინჭარაძისგან განსხვავებით, პასუხისმგებლობას ბულვარში მიმდინარე პროცესებსა და ამბასადორის მშენებლობაზე ცენტრალურ ხელისუფლებას აკისრებენ არასამთავრობო ორგანიზაციების წარმომადგენლები. თქვეს, რომ დროა ხელისუფლება გონს მოეგოს.
აქციის დაწყებამდე ხმაური მოჰყვა აქტივისტებსა და სამართალდამცველებს შორის დაპირისპირებას. მზია ქედელიძე მთავრობის სახლის წინ „არ დავთმობ ბულვარს“ წარწერის დატოვებას ცდილობდა, რაშიც ხელი სამართალდამცველებმა შეუშალეს.
აქციის მთავარ მესიჯს მესამე სექტორში ასე ხსნიან: ხელისუფლებას სურს, რომ ირაკლი ჯინჭარაძე კრიტიკული განცხადების გამო დასაჯოს, ამით კი საჯარო მოხელეები დააშინოს.
ირაკლი ჯინჭარაძის მხარდამჭერი აქცია მესამე სექტორის ორგანიზებით დაიგეგმა. შეკრებილების მოთხოვნებს მთავრობიდან არავინ გამოეხმაურა.
13
s
s
s