28, აპრილი 2021 21:30:00
7 წევრიანი ოჯახი 350 ლარის იმედად. დოლიძეები ქედის მუნიციპალიტეტიდან ქობულეთში, სოფელ ბუკნარში, რამდენიმე წლის წინ ჩამოვიდნენ. შენობა, სადაც აქამდე ცხოვრობდნენ ავარიული და სიცოცხლისთვის რისკის შემცველია. ოჯახს ალტერნატიული საცხოვრებელი არ აქვს და თავს ნათესავის სახლს აფარებს. ერთადერთი შემოსავალი, რაც დოლიძეებს გააჩნიათ, სოციალური დახმარებაა. უმეტეს ნაწილს, საბანკო ვალდებულებების დაფარვისთვის იყენებენ. შესაბამისად, თანხა საარსებოდ არ ჰყოფნით და მოქალაქეების დახმარების იმედად არიან.
ეს, დოლიძეების სახლია, თუმცა მხოლოდ პირობითად, რადგან საცხოვრებელი მათ საკუთებაში არაა. შვიდ წევრიანი ოჯახი, ბუკნარში თავს იმ შენობას აფარებს, რომელიც ნათესავს გასაყიდად აქვს გამზადებული. აქ, მანამდე იცხოვრებენ, სანამ მყიდველი არ გამოჩნდება. მათი ერთადერთი შემოსავალი სოციალური დახმარება და პენსია, რომელიც ოჯახში მცხოვრები შეზღუდული შესაძლებლობის მქონე პირებისთვისაა განკუთვნილი.
შეზღუდული შესაძლებლობის მქონე პირი, ოჯახში ორია. დედა და მცირეწლოვანი ბავშვი, რომელიც ჯანმრთელობის პრობლემების გამო განათლებას მიღებასაც ვერ ახერხებს. 32 წლის თამუნა შარაბიძე ქრონიკული პაციენტია, თუმცა, უსახსრობის გამო, ექიმთან ვიზიტის შესაძლებლობა არ აქვს.
ექიმთან კონსულტაციას ოჯახის სხვა წევრებიც საჭიროებენ. სოციალური შემოსავლიდან, 250 ლარს საბანკო ვალდებულევაში იხდიან, ეს კი, ყოველდღიურ ყოფას კიდევ უფრო უმძიმებთ. დოლიძეები, განსაკუთრებით რთულ მდგომარებაში, მას შემდეგ აღმოჩნდნენ, რაც პანდემის გამო საზღვრები ჩაიკეტა და სამუშაოდ თურქეთში გადასვლას ვეღარ ახერხებენ.
იმის გამო, რომ დოლიძეები ქედის მუნიციპალიტეტში არიან რეგისტრირებულნი, დახმარების თხოვნით ქობულეთის მერიას ვერ მიმართავენ. წინასწარ იციან, რომ უწყებისგან, ამ არგუმენტით, უარს მიიღებენ. ოჯახს, სადაც ორი შეზღუდული შესაძლებლობის მქონე პირი ცხოვრობს, ახლა მხოლოდ, ხალხის დახმარების იმედი აქვს.