ბათუმს ბულვარს განაშენიანების გეგმა აქვს. დოკუმენტი, რომელსაც საზოგადოება მოუთმენლად ელოდა, დღეს საჯაროდ პირველად განიხილეს. როგორია ზღვისპირა პარკის მომავალი და რას ითვალისწინებს პროექტი, რომელიც ბიუჯეტს, ნახევარ მილიონამდე ლარი დაუჯდა? გენგეგმას დაინტერესებული პირების მხრიდან კრიტიკა უკვე მოჰყვა.
ბათუმის ბულვარის გენერალური გეგმით, ამ ადგილას სამსართულიანი ბალნეოლოგიური ცენტრი უნდა აშენდეს. იმას, რაც საზოგადოების მხრიდან ბოლო რამდენიმე თვის განმავლობაში პროტესტის მიზეზია, ზღვისპირა პარკის განაშენიანების გეგმა არ ითვალისწინებს. პროექტის ავტორებმა პირველ საჯარო განხილვაზე ხაზგასმით აღნიშნეს, რომ 16 სართულიანი ამბასადორი კულტურული მემკვიდრეობის კანონს ეწინააღმდეგება.
ქვეყნის მთავარი რეკრეაციული ზონის სამოქმედო დოკუმენტის მიხედვით ბაღის საზღვრები 5 ზოლად დაიყო. შეთავაზებული ვარიანტით იგეგმება ბულვარის გაზრდა-გაფართოება, პორტის მიმართულებით. პროექტის ავტორები ამბობენ, რომ ზღვისპირა პარკის ყველა ნაწილი თანაბრად ფუნქციურად დატვირთული უნდა იყოს.
გენგეგმის მიხედვით, უნდა გაფართოვდეს ნინოშვილის ქუჩა, რაც სააავტომობილო გზის შეზღუდვას ითვალისწინებს. ე.წ „ეშმაკის ბორბალი“ ახალ ბულვარში უნდა გადავიდეს. შეთავაზებულია საზაფხულო თეატრის რეკონსტრუქცია. ბაღის ამ ნაწილში მედიათეკა უნდა მოეწყოს, თეატრის მიმდებარე ტერიტორიაზე კი კაფეები განთავსდეს. ზღვისპირა პარკის მთავარ შესასვლელთან, ქორწინების სახლის აღება და საგამოფენო სივრცის მოწყობა იგეგმება. ახალ ბულვარში სკეიტპარკი მოეწყობა, განთავსდება საჩრდილობლები. კომპანია, რომელმაც გენგემა შექმნა, საზოგადოებრივი აზრი 300-მდე მოქალაქეს ჰკითხა. ამას დამსწრე საზოგადოების კრიტიკა მოჰყვა. შენიშვნები გამოითქვა სხვა მიმართულებებითაც.
ხმაური გენგემის საჯარო განხილვაზე იმ მეიჯარეების გაღიზიანებამ გამოიწვია, რომლებიც დოკუმენტის განხილვას ესწრებოდნენ. კაფე-ბარების და ჯიხურების მფლობელებმა იკითხეს, გაითვალისწინა თუ არა დაქირავებულმა კომპანიამ იმ ადამიანების ინტერესები, რომლებსაც ადგილები იჯარით აქვთ აღებული.
საჯარო განხილვაზე მყოფმა მოქალაქეებმა პროექტის ავტორებს ბულვარის იერსახის შენარჩუნებისკენ მოუწოდეს და მოითხოვეს, არ დაამსგავსონ ზღვისპირა პარკი ბოტანიკურ ბაღს. შეკრებილები ამბობდნენ, რომ ხელისუფლება ამაოდ დაპირდა ინტერესების გათვალისიწნებას.
მესამე სექტორისთვის ბულვარის განაშენიანების გეგმა მისაღებია. ირმა ზოიძე ამბობს, რომ შეთავაზებული დოკუმენტი ბულვარის, როგორც კულტურული მემკვიდრეობის ძეგლის კონსერვაციას უზრუნველყობს.
გენერალური გეგმის შესამუშავება ადგილობრივ ხელისუფლებას 500 ათას ლარამდე თანხა დაუჯდა. ბულვარის ადმინისტრაციამ პროექტი კომპანია „ ბაუ დიზაინს დაუკვეთა“. სპეციალისტები გეგმას 1 წლის განმავლობაში ქმნიდნენ.
21
s
s
s