03, მაისი 2021 21:15:00
ყველა ადამიანს აქვს უფლება მიიღოს და გაავრცელოს ინფორმაცია, ასევე თავისი მოსაზრება ზეპირი, წერილობითი და სხვა ფორმით. მასობრივი ინფორმაციის საშუალებები თავისუფალია. ცენზურა - დაუშვებელი - ეს არის ჩანაწერი, საქართველოს კონსტიტუციაში, თუმცა ადამიანებს, მით უფრო ჟურნალისტებს, მუდმივად გვიწევს ბრძოლა ამ ფუნდამენტური უფლების დასაცავად. დღეს, მსოფლიო პრესის თავისუფლების დღეა. თარიღი, 1993 წელს, გაერომ დააწესა. გენერალურმა ასამბლეამ მთავრობებს შეახსენა, რომ მათი მოვალეობაა პატივი სცენ და დაიცვან გამოხატვის თავისუფლება. როგორ აფასებენ ჩემი კოლეგები ქვეყანაში არსებულ რეალობას, ია გოლიაძე გვიამბობს.
საჯარო ინფორმაციის ხელმისაწვდომობა „ბათუმელების“ ჟურნალისტისთვის მთავარი პრობლემაა. ჯაბა ანანიძე ამბობს, რომ დღევანდელი ხელისუფლების პირობებში ამ კუთხით არსებული ბარიერი საკმაოდ დიდია. ინტერნეტ გამოცემას სასამართლო დავა ორ ეპიზოდზე აქვს. ამას ემატება მმართველი ძალის მხრიდან წახალისებული აგრესია, რომელსაც საზოგადოებაც იმეორებს.
ხელისუფლების მხრიდან ჟურნალისტების დევნა და ცინიკური დამოკიდებულებები - თეონა თურმანიძე ამბობს, რომ მმართველი ძალა კრიტიკული მედიის მიმართ ძალადობას ახალისებს. აჭარის რადიოს საინფორმაციო გამოშვების წამყვანი მიიჩნევს, რომ მსგავსი ქმედებები პრესის თავისუფლების ხარისხს ასუსტებს.
პოლარიზებული მედია გარემო საზოგადოებრივი მაუწყებლის ახალი ამბების რედაქტორისთვის თანამედროვე პრესის მთავარი გამოწვევაა. მაია მერკვილაძე ამბობს, რომ აჭარის ტელევიზიის მცდელობა, ეთქვა განსხვავებული სიტყვა მედიასივრცეში - ხელისუფლებისთვის მიუღებელი აღმოჩნდა. შედეგად, ტელევიზიაში განვითარებულ მოვლენებს - ხელმძღვანელობის ცვლილებასა და თანამშრომლების დევნას იხსნებს.
თამარ კიკნაძე თითქმის 15 წელია TV 25-ის საინფორმაციო სამსახურის ჟურნალისტია. პროფესიული საქმიანობის განხორციელება სხვასხვა ხელისუფლების პირობებში უწევს. მიიჩნევს, რომ ვიდრე ქვეყნის სათავეში საზოგადოების წინაშე ანგარიშვალდებული ძალა არ მოვა, პრესის თავისუფლება კვლავაც გადაუჭრელ პრობლემად დარჩება.
პრესის თავისუფლების კუთხით საქართველო 180 ქვეყნიდან მე-60 ადგილზეა. მაჩვენებელი წინა წელთან შედარებით 0.05-ით გაუარესდა. საუკეთესო მაჩვენებელი ნორვეგიას, ხოლო ბოლო ადგილზე ჩრდილო-აღმოსავლეთ აფრიკის სახელმწიფო ერიტრეაა - 81,45.