10, მაისი 2021 21:45:00
ჯანდაცვის ხელმისაწვდომობა და ხარისხი, საქართველოსთვის, კვლავაც შეუსრულებელ ამოცანად რჩება. პრობლემა, რომ წლებია უცვლელია, ამაზე არაერთი სტატისტიკაც მეტყველებს. არა და, „ქართული ოცნება“ წინასაარჩევნოდ გვპირდებოდა, რომ ჯანდაცვის სერვისები თითოეული მოქალაქისთვის ხელმისაწვდომი იქნებოდა. დღევანდელი რეალობა კი ასეთია: გაძვირებული სამედიცინო მომსახურების გამო, ადამიანები, უკიდურესი მდგომარეობის გარდა, კლინიკაში მისვლას ვერ ახერხებენ. ძვირია წამლებიც. ანუ გამოდის, რომ კანონი და არსებული პრაქტიკა, ერთმანეთისგან საკმაოდ განსხვავდება.
იმის გამო, რომ შესაძლებლობა არ აქვს, მედიკამენტებს არასრულად იღებს. სრული კურსის ჩატარებას და მითუმეტეს ექიმთან ვიზიტს, სიდუხჭირის გამო, ვერ ახერხებს. მკუნალობა, 34 წლის თამილა ირემაძესთან ერთად, მის ორ მცირეწლოვან შვილსაც ესაჭიროება, თუმცა ამბობს, რომ ჯანდაცვის მომსახურების ხარჯებს ვერ სწვდება. დაფინანსებაზე განცხადება, რამდენჯერმე დაწერა, პასუხს კი, როგორც რამდენიმე თვის წინ, ახლაც, უშედეგოდ ელოდება. ირწმუნება, რომ დახმარების თხოვნით მისული, აჭარის ჯანდაცვის სამინისტროდან უარით გამოისტუმრეს.
უკიდურესი და გადაუდებელი მდგომარეობის გარდა, რომ მოქალაქე ექიმთან მისვლას ვერ ახერხებს, ამაზე ჯანდაცვის ექსპერტებიც საუბრობენ. ვატო სურგულაძის თქმით, თანადაფინანსების პროგრამა გაუმართავად მუშაობს, მედიკამენტების ყოველდღიურ გაძვირებას კი, სახელმწიფო ვერ აკონტროლებს.
მიუწვდომელ ჯანდაცვის მომსახურებასთან ერთად, კიდევ, ერთი ფაქტორი იკვეთება. რამდენად ხარისხიანია სამედიცინო მომსახურება? ოპოზიციაში ფიქრობენ, რომ ჯანდაცვას ხარისხის პრობლემები აქვს და ეს უკეთესად პანდემიისას გამოჩნდა. ლევან ანთაძე ამბობს,რომ ექიმები შესაბამისად გადამზადებულნი არ არიან, რის გამოც ხშირად მოქალაქეები ზარალდებიან. „ნაციონალური მოძრაობის წევრი, ყურადღებას ინფრასტუქტურაზეც ამახვილებს. ამბობს, რომ მაღალმთიან რეგიონებში სასწრაფო-სამედიცინო მომსახურების მიღება მოსახლეობისთვის სირთულეს წარმოადგენს.
მოქალაქეების გარკვეული კატეგორია, რომ სრულფასოვანი სამედიცინო მომსახურების მიღებას ვერ ახერხებს, ფაქტია. აჭარის ჯანდაცვის სამინისტროში კი, ამტკიცებენ, რომ ჯანდაცვა ყველა მოქალაქისთვის ხელმისაწვდომია. მინისტრის მოადგილე, ამ კუთხით, რამდენიმე ფაქტორზე ამახვილებს.
პანდემიის ფონზე, სიდუხჭირეში მყოფი მოქალაქეების რაოდენობა, რომ გაიზარდა სადაო არავისთვისაა. ყველაზე რთულ მდგომარეობაში კი, ის პირები აღმოჩნდნენ, რომლებსაც ქრონიკული დაავადებები აწუხებთ. ამ ფონზე, ლარის გაუფასურების პარალელურად, მედიკამეტებზე ფასები ყოველდღიურად იმატებს.