ბათუმის მესამე საჯარო ბაღში გამართული ღონისძიება მშობლებისთვის დახურული იყო. სამაგიეროდ, აქტივობაზე დასწრებისას ბარიერი აჭარის უმაღლესი საბჭოს თავმჯდომარეს არ შექმნია. ზეიმზე, დავით გაბაიძემ, დასწრება დაწესებულების გამგის თანხმობის საფუძველზე შეძლო. როგორც ირკვევა, ნანა თედორაძემ რეგიონის პირველი კანონდებელი ღონისძიებაზე მისი სტატუსის გამო დაუშვა.

„რახან გლეხი კაცი ვარ, ჩემი შვილის ზეიმს ვერ უნდა დავესწრო? ესაა სამართალი?“- გვიყვება ერთ-ერთი მშობელი, რომელმაც ანონიმურად დარჩენა ამჯობინა.

დავით გაბაიძის ღონისძიებაზე დაშვება, სხვა მშობლების განაწყენების საფუძველი გახდა. ფაქტის შესახებ ინფორმაცია TV25.GE-ს მშობლებმა მიაწოდეს და ინფორმაციის გარკვევა ითხოვეს.  

• ჟურნალისტი: მშობლები რატომ არ დაუშვით ღონისძიებაზე?

ნანა თედორაძე, ბაღის გამგე: კოვიდის პირობებში მშობლებს როგორ დავუშვებდი ღონისძიებაზე?

• ჟურნალისტი: აჭარის უმაღლესი საბჭოს თავმჯდომარემ როგორ მოახერხა ზეიმზე დასწრება?

ნანა თედორაძე: გიდასტურებთ, დავით გაბაიძე ესწრებოდა ღონისძიებას, თუმცა მას კონონავირუსზე ტესტი ჰქონდა აღებული.

• ჟურნალისტი: დავით გაბაიძის შემთხვევაში გამონაკლისი რატომ დაუშვით? იქნებ სხვა მშობელსაც ჰქონდა ტესტის პასუხი?

ნანა თედორაძე: გამონაკლისი არ დამიშვია. ეს ღონისძიება არ იყო მშობლებისთვის.

• ჟურნალისტი: თუ ასე იყო, მაშინ უმაღლესი საბჭოს თავმჯდომარე რა სტატუსით ესწრებოდა აქტივობას?

ნანა თედორაძე: რა გინდა ახლა მითხარი? რა პასუხს ელოდებით ჩემგან? (რამდენიმე წამიანი დუმილი) ავტ. თქვენ ასეთ დროს როგორ მოიქცეოდით? პირველი პირი, როცა მოდის რა მეთქვა? ჭიშკარს ხომარ დავუკეტავდი? ჯერ ერთი, ბატონ დავითს ჩემთან ჰყავს შვილი ბაღში და მეუღლესთან ერთად მოვიდა როგორც მშობელი. ბატონმა დათომ პატარებს საჩუქრები მოუტანა.

• ჟურნალისტი: თანასწორობის პრინციპი რატომ არ დაიცავით? დავით გაბაიძე იმიტომ დაუშვით ღონისძიება, რომ ის მაღალჩინოსანია?

ნანა თედორაძე: არცერთ მშობელს არ ჰქონია პრეტენზია. მე თქვენ მინახეთ მშობელი, ვისაც შემოსვლაზე უარი ვუთხარი, ასეთი ბუნებაში არ არსებობს. გაბაიძის გარდა კიდევ 4 მშობელი იყო, ისინი საორგანიზაციო საკითხებში მეხმარებოდნენ. რა გინდათ ვერ გავიგე? ერთი ლამაზი დღე მოვუწყვე ბავშვებს და რაღაცას მეკირკიმალავებით. ახალგაზრდა ბიჭისგან არ არის ლამაზი. შევხვდებით ერთმანეთს ქალაქში.

დავით გაბაიძე პასუხისმგებლობას დაწესებულების ხელმძღვანელს აკისრებს. სატელეფონო საუბრისას გვითხრა, რომ ღონისძიებას გამგის ნებართვის საფუძველზე დაესწრო. უმაღლესი საბჭოს თავმჯდომარე აქვე აღნიშნავს, რომ იმ დროს კორონავირუსზე გატესტილი იყო.

„სამწუხაროა თუ ვინმე განაწყენდა. პირიქით, მე ვფიქრობდი, რომ ჩემი იქ ყოფნა გაუხარდებოდათ,“- განაცხადა დავით გაბაიძემ.

ბათუმის საბავშვო ბაღების გაერთიანებაში საკითხზე კომენტარი არ გააკეთეს. დაწესებულებაში გვითხრეს, რომ გადაწყვეტილებას თავად გამგე ღებულობს და პასუხისმგებლობაც მასზეა.

Tags:

გაზიარება

15