04, ივნისი 2021 21:59:00
4 წევრიანი ოჯახი სიღარიბის ზღვარზე. გურგენიძეები ბათუმიდან თავს ერთადერთი შემოსავლით- 170 სოციალური დახმარებით ირჩენენ. ჯანმრთელობის პრობლემების ფონზე ეს საკმარისი რა თქმა უნდა, არ არის. უკიდურესად გაჭირვებულები ამორტიზებულ სახლში ცხოვრობენ და კეთილი ადამიანების დახმარების იმედად არიან. თეო ფუტკარაძე გიამბობთ
ამ ორ ოთახში გურგენიძეების 4 წევრიანი ოჯახი ცხოვრობს. სახლი, რომ საცხოვრებლად უვარგისია, ეს კადრებიც ცხადყოფს. მდგომარეობა განსაკუთრებით, უამინდობისას უმძიმდებათ. ამ დროს საცხოვრებელშიც ისე წვიმს, როგორც გარეთ.
სიდუხჭირეს, ჯანმრთელობის პრობლემებც ემატება. ოჯახის ოთხივე წევრს, მკურნალობა ესაჭიროება. ყველაზე პატარა 4 წლის ბაჩი, ე.წ. მგლის ხახის დაავადებით დაიბადა. მართალია ოპერაცია ჩაუტარდა, თუმცა, მეტყველება და კვება დღემდე უჭირს. ოჯახს მისთვს, ყოველდღიურად, სპეციალური საკვების შესაძენად, სახსრები არ გააჩნია.
სიღარიბის ზღვარს მიღმა მყოფი ოჯახის შემოსავალი 170 ლარიანი სოციალური შემწეობაა. ამას ემატება, მათგან უხუცეს წევრის ასაკობრივი პენსია. თანხის ნაწილით, იმ საბანკო სესხს იხდიან, რომელიც შვილისშვილის ოპერაციისთვის აიღეს. მეორე ნაწილი კი, მედიკამენტებისთვისაც არ ჰყოფნით.
მიუხედავად იმისა, რომ ოჯახი სოციალური შემწეობითაც სარგებლობს და ჯანდაცვის პროგრამებითაც, ეს მათთვის საკმარისი არ არის. უკიდურესად გაჭირვებული ოჯახისთვის, განსაკუთრებული პრობლემა, სამედიცინო მეთვალყურეობისთვის საჭირო თანხის უქონლობაა. ვისაც გსურთ, გურგენიძეებს მძიმე ყოფა შეუმსუბუქოთ, მათი ნახვა, ბათუმში, ლადო ასათიანის პირველი ჩიხის 8 ნომერში შეგიძლიათ.