08, ივლისი 2021 21:20:00
დავდოთ უნდა თუ არა სოციალურ ქსელში ბავშვების ფოტოები? კითხვა, რომელიც შესაძლოა ბევრ მშობელს აფიქრებს, თუმცა ამის მიუხედავად, ყოვედღიურ რეჟიმში ინტერნეტსივრცე პატარების სურათებით ივსება. პარალელურად ყოველდღიურად გვესმის მოწოდებები ბავშვთა უფლებების დამცველებისგან და ფსიქოლოგებისგან, რომ ეს არ უნდა გავაკეთოთ. რეალურად კი ეს მართლაც საფრთხის შემცველია, რადგან საჯაროდ ატვირთული ფოტოები სხვადასხვა მიზნით შეიძლება გამოიყენონ
უნდა განვათავსოთ თუ არა ბავშვების ფოტოები სოციალურ ქსელებში? აზრი მშობლებს ვკითხეთ. პასუხი ცხადია, უარყოფითია. მათი შეფასებით, ის, რაც ინტერნეტსივრცეში ერთხელ ქვეყნდება, შესაძლოა, წლების შემდეგაც არ გაქრეს. ანუ, გამოდის, რომ მშობლები ბავშვებს წარუშლელ ანაბეჭდებს უტოვებენ.
მოზარდების ფოტოების საჯაროდ გამოქვეყნებას, სოციალურ ქსელშიც ღიად ეწინააღმდეგებიან. წერენ, რომ სხვადასხვა გვერდზე ხშირად, პატარების შიშველი ფოტოები ხვდებათ, რაც კატეგორიულად მიუღებელია.
თავიანთი არგუმენტი აქვთ ფსიქოლოგებს. ეთერ ვარშანიძის შეფასებით, გარდატეხის ასაკში მოზარდებისთვის განსაკუთრებული სტრესია, წლების წინ, მათთან შეთანხმების გარეშე გამოქვეყნებული ფოტოები ან/და ვიდეოები. დარგის სპეციალისტის თქმითვე, მსგავსი სიტუაციის გამო, ბავშვები სკოლაში ბულინგის მსხვერპლნიც ხშირად ყოფილან.
არასამთავრობო ორგანიზაცია „იალქანში“ ფიქრობენ, რომ ბავშვის მაიდენტიფიცირებელი მასალის გამოქვეყნება კატეგორიულად მიუღებელია. თიკო აბაშიძის განმარტებით, ფოტოები შესაძლოა სხვადასხვა მიზნით გამოიყენონ და არასასურველ ინტერნეტგვერდებზე განათავსონ.
საბოლოო ჯამში, ყველა ერთხმად თანხმდება, რომ ბავშვების ფოტოების სოციალურ ქსელში გამოქვეყნება მიუღებელია. ამის მიუხედავად, მსგავსი თემატიკის კადრები, მაინც მრავლად ვრცელდება. ევროპული პრაქტიკის მიხედვით, 13 წლამდე ასაკის ბავშვების მაიდენტიფიცირებელი მასალის გასაჯაროების დროს ნებისმიერ პირს მშობლის წერილობითი თანხმობა სჭირდება, 13 წლის ზევით კი, თავად მოზარდებისაც.