დარღვეული შეთანხმება და შარლ მიშელის მორიგი ვიზიტი საქართველოში. რამდენიმე თვის წინ, ევროპელი დიპლომატის მედიაციით გაფორმებული დოკუმენტი, რომელსაც ხელი მმართველმა გუნდა, ოპოზიციასთან ერთად მოაწერა, "ქართული ოცნებისთვის" უმნიშვნელო აღმოჩნდა. ხელისუფლებამ, შეთანხმების რამდენიმე პუნქტი უკვე დაარღვია. არადა თავის დროზე, ოპონენტებს აფრთხილებდნენ რომ გაწერილი წესები ზედმიწევნით დაეცვათ. ოპოზიციაში ეს არ უკვირთ და ამბობენ, რომ პასუხი დასავლეთისგან მკაცრი იქნება.
პრინციპულად მნიშვნელოვანი შეთანხმების შესაძლო დამრღვევად, „ქართული ოცნება“ ოპოზიციას მოიაზრებდა, თუმცა მმართველ გუნდს, თავისივე ნათქვამი, ბუმერანგივით დაუბრუნდა. ხელისუფლებამ, შარლ მიშელის დოკუმენტის 6 მუხლიდან რამდენიმე უკვე დაარღვია. არადა, ხელშეკრულებით გათვალისწინებული პუნქტების, ზედმიწევნით შესრულებისკენ ოპონენტებს მოუწოდებდნენ.
შარლ მიშელის შეთანხმების ერთ-ერთი ბოლო პუნქტი, რომელიც „ქართულმა ოცნებამ“ დაარღვია, იუსტიციის უმაღლესი საბჭოსმიერ, უზენაეს სასამართლოში უვადო მოსამართლეების დანიშვნვა იყო. ევროპელი დიპლომატის დოკუმენტის თანახმად, სასამართლო რეფორმის გატარებამდე უზენაეს სასამართლოში ყველა მიმდინარე პროცესი უნდა შეჩერებულიყო, თუმცა იუსტიციის უმაღლეს საბჭოში ეს გარემოება უგულებელყვეს.
შარლ მიშელის დოკუმენტის პუნქტების დარღვევას კრიტიკულად აფასებს ამერიკის შეერთებული შტატები. სახელმწიფო დეპარტამენტის განმარტებით, ხელშეკრულების პირობების არასრულად იმპლემენტაციამ შესაძლოა ინვესტორთა ნდობა შეამციროს და საქართველოს პოლიტიკური და სოციალური ინსტიტუტების მდგრადობა კითხვის ნიშნის ქვეშ დადგეს.
რა შედეგებამდე შეიძლება მიგვიყვანოს დარღვეულმა პუნქტებმა? პარტიაში „ლელო საქართველოსთვის“ფიქრობენ, რომ შარლ მიშელის მორიგი ვიზიტი ქვეყანაში სწორედ „ოცნების“ მხრიდან დარღვეულ პუნქტებს უკავშირდება. ოპონენტები, ყურადღებას, შესაძლო სანქციების დაწესებაზე ამახვილებენ.
ხელისუფლების მხრიდან დოკუმენტის მუხლების დარღვევა არ უკვირთ პარტიაში „გირჩი - მეტი თავისუფლება“. თემურ გორგაძის განმარტებით, მმართველ გუნდს, ამისთვის, ევროპელი დიპლომატების ხელმეორე ვიზიტისას, პასუხი მკაცრად მოეთხოვება.
ერთადერთი პარტია, რომელიც საკანონმდებლო ორგანოში მიშელის დოკუმენტზე ხელმოწერის გარეშე შევიდა, „ნაციონალური მოძრაობა“ იყო. ოპოზიცია დღეს ამბობს, რომ შარლ მიშელის მორიგი ვიზიტი „ქართული ოცნებისთვის“ მძიმე იქნება, რადგან მათივე თქმით, დასავლელი პარტნიორები „პირობების შეუსრულებლობას არ პატიობენ“.
რატომ დაარღვია მმართველმა გუნდმა შეთანხმებიდან თითქმის 3 თვის თავზე დოკუმენტის პუნქტები? განმარტებების მოსმენა აჭარის უმაღლესი საბჭოს დეპუტატებისგან გვსურდა, თუმცა ხელისუფლების წარმომადგენლებმა კომენტარზე უარი გვითხრეს. ეს კი ის შემთხვევაა, როცა, მათთვისსამწუხაროდ, „ქართული ოცნება“ მომხდარს, პანდემიას ვერ დააბრალებს.