საქართველომ დღეს მნიშვნელოვან ღონისძიებას უმასპინძლა. ბათუმში საერთაშორისო კონფერენცია „ევროკავშირის მიზიდულობის ძალა და რეგიონის ტრანსფორმაცია“ გაიხსნა. სამი ქვეყნის: უკრაინის მოლდავეთისა და საქართველოს პრეზიდენტმა, ასევე, ევროპული საბჭოს პრეზიდენტმა, ევროატლანტიკურ სივრცეში არსებული გამოწვევები, შესაძლებლობები და მოკავშირეებს შორის თანამშრომლობის განვითარების პერსპექტივები განიხილეს. მაღალი რანგის სტუმრებს, კონფერენციის გახსნამდე საქართველოს მთავრობის მეთაურმა ირაკლი ღარიბაშვილმა და პრეზიდენტმა ზურაბიშვილმა უმასპინძლეს. რა განცხადებები გაკეთდა ღონისძიებაზე? „საქართველოს ევროპული გზა“ - ია გოლიაძე ესწრებოდა კონფერენციას.
“საქართველოს ევროპული მომავალი არის გარდაუვალი და განუყოფელია ჩვენი ისტორიისგან და ფასეულობებისგან” - ასე დაიწყო სიტყვით გამოსვლა ბათუმის საერთაშორისო კონფერენციაზე საქართველოს პრეზიდენტმა. როგორც სალომე ზურაბიშვილმა განაცხადა, ამ საკითხთან დაკავშირებით მმართველ გუნდსა და ოპოზიციურ სპეკტრს შორის სრული კონსესუსი არსებობს და დებატებს არ საჭიროებს.
მე-17 საერთაშორისო კონფერენციაზე სიტყვით გამოსვლისას საქართველოს პრემიერ-მინისტრმა ხაზი იმ ვალდებულებების შესრულებას გაუსვა, რომელიც საქართველოს ევროპულ და ევროატლანტიკურ სტრუქტურებში ინტეგრაციის კონტექსტში აქვს ნაკისრი. ირაკლი ღარიბაშვილის განცხადებით, ამ გზაზე საქართველო დაწინაურდა და აქტიური მონაწილეობა გააგრძელა აღმოსავლეთ პარტნიორობის ფარგლებში.
„საქართველოს ევროპული გზა“ - კონფერენციაზე საქართველოს, უკრაინისა და მოლდოვის „ასოცირებული ტრიოს“ ფარგლებში შეთანხმება შედგა. უკრაინის პრეზიდენტის განცხადებით, ეს ახალი რეგიონული განზომილებაა. მისივე თქმით, არსებობს საერთო მიზნები, რაც ევროკავშირის სრული წევრობა, თავისუფლება, თანასწორობა და დემოკრატიაა.
ევროპული საბჭოს პრეზიდენტმა კი სიტყვით გამოსვლისას ხაზი გაუსვა იმის აუცილებლობას, რომ ასოცირების პარტნიორებს შორის მჭიდრო თანამშრომლობა ჩამოყალიბდეს. შარლ მიშელის განცხადებით, აღმოსავლეთ პარტნიორობა არის ის ლოკომოტივი, რომლის ტრანსფორმაციაც კეთილდღეობას და ეკონომიკურ განვითარებას შეუწყობს ხელს. ევროპული საბჭოს პრეზიდენტის თქმით, ასოცირების შეთანხმება, მათ შორის ღრმა და თავისუფალი ვაჭრობის სივრცე არის ყველაზე ამბიციური ფორმა თანამშრომლობისა, რომელიც ევროკავშირს ნებისმიერ სხვა ქვეყანასთან აქვს.
საერთაშორისო კონფერენცია „ევროკავშირის მიზიდულობის ძალა და რეგიონის ტრანსფორმაცია“ ბათუმში დღეს გაიხსნა. შარლ მიშელის გარდა, ღონისძიებას მოლდოვის და უკრაინის პრეზიდენტები დაესწრნენ. განიხილეს ისეთ საკითხები, როგორიცაა ევროატლანტიკურ სივრცეში არსებული გამოწვევები, შესაძლებლობები და მოკავშირეებს შორის თანამშრომლობის განვითარების პერსპექტივები.
13
s
s
s