20, ივლისი 2021 17:58:00
დღეს მუსლიმური სამყარო ყურბან ბაირამს ზეიმობს. დღესასწაული ტრადიციულად წელიწადში ერთხელ, რამაზნის მარხვიდან 70-ე დღეს აღინიშნება. მეჩეთში დილის ლოცვის დასრულების შემდეგ, მორწმუნეები მსხვერპლშეწირვის რიტუალს ასრულებენ და პირუტყვს კლავენ. როგორ აღნიშნეს მორწმუნეებმა ყურბან ბაირამი ბათუმში და როგორ მიულოცა მთავრობის თავმჯდომარემ მათ?
ასე მუსლიმები ერთმანეთს ორი მთავარი დესასწაულიდან ერთ- ერთს, ყურბან ბაირამს ულოცავენ. ისინი დღესასწაულს რამადან ბაირამიდან 70-ე დღეს აღნიშნავენ. თარიღი აბრაამის მსხვერპლშეწირვის დღეს უკავშირდება.
ყურბან-ბაირამზე ყველა მორწმუნე ვალდებულია, ალაჰს ოთხფეხა შინაური ცხოველი შეწიროს. შეწირული ცხოველის ხორცი, რამდენიმე ოჯახზე თანაბრად ნაწილდება. თითოეული ოჯახი კი, ხორცს სამ ნაწილად ყოფს და ხელმოკლე ოჯახებს ურიგებენ. თარიღთან დაკავშირებით, მუსლიმები უხვად გასცემენ მოწყალებას. ერთმანეთს ტკბილეულით უმასპინძლდებიან და წინაპართა საფლავებზე გადიან.
მორწმუნეებმა დღესასწაულის აღსანიშნად ბათუმში, ნამაზის ლოცვა ორთა ჯამეში შეასრულეს. სამლოცველოში ფართის სიმცირის გამო, ადამიანებმა ხალიჩები მეჩეთის ეზოსა და მიმდებარე ქუჩაზეც გაშალეს. იმის გამო, რომ ახალი სალოცავის აშენების დაპირება წლებია არ სრულდება, მორწმუნეებმა თანხის შეგროვება საკუთარი სახსრებით დაიწყეს.
მუსლიმი მორწმუნეებისთვის დღესასწაულის მისალოცად, აჭარის მთავრობის თავმჯდომარეც მივიდა. როგორც ჩანს, თორნიკე რიჟვაძეს მათთვის, დაპირებების მარაგი ამოეწურა და მორწმუნეებს, მხოლოდ, სიძლიერე უსურვა. არადა, სულ რაღაც 2 თვის წინ, რამადან ბაირამზე, იგი მლოცველებს, ახალი მეჩეთის მშენებლობაზე ესაუბრებოდა. დღეს კი, ამბობს, რომ საბოლოო გადაწყვეტილება ჯერ მიღებული არაა.
ყურბან ბაირამს 4 ათას წლოვანი ისტორია აქვს. იგი ისლამურ სამყაროში მეგობრობის, თანადგომის, ქველმოქმედების და ღმერთთან დაახლოების დღესასწაულია. ყურბან ბაირამი დღეს დაიწყო და სამი დღის განმავლობაში გაგრძელდება.