"თუ კარგად მოიქცევით და ზრდილობას გამოიჩენთ მთავრობის სხდომაზე დაგიშვებთ,"- თორნიკე რიჟვაძე
პოლიტიკა
შეკვეთა მიცემულია, თუმცა ამჯერად არა რესტორანში რომ მორიგი ქორწილი ან მთავრობის გასვლითი სხდომა იზეიმონ, კრიტიკული მედიის ობიექტივების გარეშე, არამედ, დაკვეთაა გაცემული თავს დაესხან ყველგან კრიტიკულ მედიას. თავის მოწონების რეჟიმში ახლა ქართული ოცნების ახალგაზრდული ფრთაა. წინ არჩევნები და დაანონსებული ახალი სახეებია, რომლებიც შესაძლოა, მედიაზე თავდასხმის გამო საკრებულოს სადეპუტატო სკამებზეც კი აღმოჩნდნენ. წერენ, აზიარებენ და აკომენტარებენ სიძულვილის ენით გაჯერებულ ტექსტებს ყველა იმ მედია საშუალებაზე, რომელიც მათთვის მხოლოდ იმიტომაა მიუღებელი და სამიზნე, რომ იმაზე მეტ კითხვას ვსვამთ და იმაზე მეტს ვუყვებით მოქალაქეებს, ვიდრე მათ აწყობთ. გაიცანით ადამიანები, ვისაც ავალებენ და ვინც ასრულებს დაკვეთას - დაგვიპირისპირდეს - სიმართლის თქმის გამო.
ისევ ცინიზმი. აჭარის მთავრობის თავმჯდომარეს სხდომებზე კრიტიკული მედიის დაბლოკვის შესახებ დასმული კითხვა, ჩვეულებისამებრ, სასაცილოდ ეჩვენა. როგორია კარგად მოქცევა ან სად გავცდით ზრდილობის საზღვრებს- ვერ გავიგეთ, თუმცა როგორც ჩანს, თორნიკე რიჟვაძისთვის ჩვენს მიერ დასმული არასასიამოვნო კითხვები და-ძმურად მოპყრობის ჩარჩოებს სცდება. ეს ის შემთხვევაა, როცა რეგიონის პირველმა პირმა, ღიმილიანი, დამაკნინებელი პასუხით „დაგვაოკა“.
ეს არ გაგვკვირვებია. არც პრემიერის გუშინდელი რეპლიკა გაგვიკვირდა, როცა ბათუმში მყოფმა ღარიბაშვილმა, იმის ნაცვალად, რომ ჟურნალისტების კითხვაზე „როდის აიღებს პასუხისმგებლობას 5-6 ივლისს მომხდარ ამბებზე“ ,პასუხის გაცემის ნაცვლად, კითხვა ბუმერანგივით მოაბრუნა. „როდის გადადგებით“ - ამ ფორმით მთავრობის მეთაურიც ჩვენს დაცინვას შეეცადა.
მაღალჩინოსნების რიტორიკას და ცინიზმს მმართველი გუნდის აქტივისტები და მხარდაჭერებიც იმეორებენ. მაგალითებით სავსეა სოციალური ქსელი. განსაკუთრებული აგრესიით გამოირჩევა, მთავრობის თავმჯდომარის ნათესავი, მანუჩარ რიჟვაძე, რომელიც მუდმივად მსგავსი შინაარსის პოსტებს აზიარებს. თორნიკე რიჟვაძის ბიძაშვილს არც გიორგი გიორგაძე ჩამოუვარდება, რომელიც TV 25 -ს თავს მუდმივად ესხმის. მათ სიაშია ნათია რამიშვილი, გიორგი სირაბიძე, დავით მოისწრაფიშვილი. ჩამონათვალი გრძელია და მას მარტივად იპოვით, თუ კრიტიკული მედიების ფეისბუქს გადახედავთ. ვინ რა სარგებელს იღებს მსგავსი პოსტების გაზიარებაში ან მედიაზე თავდასხმისთვის- ჩვენთვის მარტივად მისახვედრია. მაგალითისთვის. გიორგი გიორგაძე ბათუმის ავტოტრანსპორტში, ერთ- ერთ განყოფილებას ხელმძღვანელობს. რიჩარდ სირაბიძე ქართული ოცნების ახალგაზრდულ ფრთას ხელმძღვანელობდა.
ასე TV პირველის რეპორტიორს აჭარის პოლიციის უფროსი ავთანდილ გალდავა ესაუბრება. გომელაურის უწყების თანამშრომელი ჟურნალისტს თავს ესხმის და აგრესიული ტონით იქაურობის დატოვებას აიძულებს.
მედია ერთადერთი არ არის, ვისაც თავს ესხმიან. იდენტურ მდგომარეობაშია ყველა, ვინც ხელისუფლებას აკრიტიკებს. ოპოზიციაში კონკრეტულ სახელ- გვარებს ასახელებენ და ამბობენ, რომ ისინი მესიჯბოქსს მთავრობისგან იღებენ.
რიტორიკის შეცვლისკენ მოუწოდებს ხელისუფლებას „ჟურნალისტური ეთიკის ქარტია“ . მარიამ გოგოსაშვილი ამბობს, რომ სწორედ მსგავსი წახალისებით მივიღეთ 5-6 ივლისი, რამაც პროცესები ჩიხში შეიყვანა.
უკვე რამდენიმე წელია ხელისუფლება კრიტიკულ მედიას თავს ესხმის, რის გამოც ჟურნალისტებს მუშაობა თავდაცვის რეჟიმში უწევთ.