22, ივლისი 2021 21:15:00
ნახევარ საუკუნეზე მეტი ფოტოგრაფიაში. ბათუმის ცენტრალურ ნაწილში, ერთ-ერთ პატარა ქუჩაზე, დღემდეა ფოტოსტუდია, რომელიც ძველ ისტორიას ინახავს და ახალს ახლა წერს. ისტორიას ადამიანების, ქალაქის წარსულის,აწმყოს, საინტერესო ფაქტების თუ მოვლენების. მამის, ამირან ნიკოლაიშვილის მიერ, საუკუნის წინ დაწყებულ საქმიანობას შვილი დღემდე განაგრძობს.
ეს ბათუმში, იმნაძის ქუჩაა. ის მონაკვეთი, სადაც საუკუნოვანი ფოტოსტუდია მდებარეობს. ბევრისთვის ცნობილი ფოტოგრაფი, ფრიდონ ნიკოლაიშვილი, მამის საქმიანობას უკვე ნახევარ საუკუნეზე მეტია განაგრძობს. მისი ყოველდღიურობა ასეთი დაახლოებით, 10 წლის ასაკიდანაა. სურათების გადაღების პროცესი, მისთვის, 65 წლის ასაკშიც ისეთივე საინტერესოა, როგორც მაშინ, როცა მამის ფოტოჯიხურში პირველად შეიხედა.
21-ე საუკუნეში, ინფორმაციული ტექნოლოგიების ეპოქაში, საქმის შესრულება გამარტივებული წესით უწევს. წინააღმდეგი არ არის და დროს მოერგო, თუმცა ამბობს, რომ ლენტზე მუშაობა გაცილებით საინტერესო იყო. დასძენს, რომ გადაღების პროცესში მთავარი ხასიათია, განსაკუთრებით კი პორტრეტისთვის.
ქალაქის ისტორიის მემეტიანე ქვეყნის საზღვრებს არაერთხელ გასცდა. შესაბამისად ფოტოსტუდია საზღვარგარეთ გადაღებულ ბევრ საინტერესო სურათსაც ინახავს. მამაზე უკეთესი ფოტოგრაფობის ამბიცია არ აქვს. ამბობს, რომ მაშინ ის ერთადერთი იყო.
ფოტოების გარდა, ირგვლივ, აქ რასაც ხედავთ ყველაფერი ძველია, დროს გადარჩენილი: ციფრულები, სხვადასხვა ელემენტები. სივრცე ფოტოგრაფისთვის ბევრ მნიშვნელოვან საჩუქარსაც იტევს. განსაკუთრებულ ყურადღებას მეგობრის მირთმეული ნარდი იპყრობს, მისივე გამოსახულებით. არანაკლებ ძვირფასია ეს ნივთი, რომელიც შვილიშვილმა ბაბუას დაბადების დღეზე უსახსოვრა.
ფოტოგრაფს სამომავლოდ ერთი სურვილი აქვს: დიდი ბაბუის სახელი შვილიშვილებმა ქალაქს დიდხანს შემოუნახონ.