საფრანგეთში გამგზავრებაზე ახალი რეგულაციები დაწესდა. ინფორმაციას საფრანგეთში საქართველოს საელჩო Facebook-ზე ავრცელებს.
საფრანგეთის მთავრობის გადაწყვეტილებით, 2021 წლის 17 ივლისს 00:00სთ-იდან წამლის ევროპული სააგენტოს მიერ აღიარებული ვაქცინით (ფაიზერი, მოდერნა, ასტრა-ზენეკა და ჯონსონ&ჯონსონი) სრულად აცრილი მგზავრები, რომელი ქვეყნიდანაც არ უნდა მოემგზავრებოდნენ, საფრანგეთის ტერიტორიაზე შემოსვლისას აღარ ექვემდებარებიან არანაირ შეზღუდვას, მათ შორის, არც პსრ-ტესტის უარყოფითი პასუხის წარდგენას.
ამასთან, ახალი გადაწყვეტილების შესაბამისად, ვაქცინაცია სრულად ჩატარებულად ითვლება მეორე დოზის გაკეთებიდან 7 დღის შემდეგ, ნაცვლად აქამდე არსებული 14 დღისა.
არა ვაქცინირებული მგზავრებისთვის ძალაში რჩება ქვეყნების მიხედვით აქამდე არსებული რეგულაციები:
თუ თქვენ, საფრანგეთში „მწვანე“ ქვეყნიდან მოემგზავრებით და არ გაქვთ გაკეთებული აცრა, კვლავ დაგჭირდებათ 72 საათის განმავლობაში გაკეთებული პსრ-ტესტის ნეგატიური პასუხი. საფრანგეთიდან „მწვანე“ ქვეყანაში გამგზავრებისას კი, უნდა გაითვალისწინოთ დანიშნულების ქვეყანაში არსებული რეგულაციები.
თუ საფრანგეთში მოემგზავრებით „წითელი“ ზონის ქვეყნიდან და არ გაქვთ გაკეთებული ვაქცინა, უნდა წარმოადგინოთ ქვეყანაში შემოსვლისთვის აუცილებელი, შესაბამისი იმპერატიული მიზეზი, ასევე, 72 საათის განმავლობაში გაკეთებული პსრ-ტესტის ან 48 საათის განმავლობაში გაკეთებული ანტიგენური ტესტის უარყოფითი პასუხი. მოგიწევთ, 10 დღიანი სავალდებულო კარანტინიც.