საქართველოს მთავრობა სასოფლო-სამეურნეო ტექნიკის თანადაფინანსების პროგრამას იწყებს. როგორც პრემიერ-მინისტრმა მთავრობის დღევანდელ სხდომაზე განაცხადა, საგრანტო პროგრამის ღირებულება 50 მილიონ ლარს შეადგენს.
„ძალიან მნიშვნელოვან პროგრამას ვიწყებთ სოფლის მეურნეობის მიმართულებით, ეს არის ჩვენს მიერ დაანონსებული პროგრამა, რომელიც ითვალისწინებს სასოფლო-სამეურნეო ტექნიკის თანადაფინანსებას. ეს არის საგრანტო პროგრამა, რომლის ღირებულება შეადგენს 50 მილიონ ლარს“,- თქვა ირაკლი ღარიბაშვილმა.
გარემოს დაცვის და სოფლის მეურმეობის მინისტრის განმარტებით, სასოფლო სამეურნეო მექანიზაციის თანადაფინანსების პროგრამაში მონაწილეობის მიღების მსურველებს, სექტემბრიდან შეეძლებათ განცხადებების სამინისტროში შეტანა.
ლევან დავითაშვილის თქმით, მოსახლეობას, რომელსაც ფინანსური რესურსები არ ჰყოფნის სასოფლო სამეურნეო მექანიზაციის შესაძენად, ეს პროგრამა მნიშვნელოვან შეღავათს მისცემს.
„უკვე სექტემბრიდან ჩვენ შეგვიძლია პროგრამაში მონაწილეთა მსურველთაგან მივიღოთ განაცხადებები. ჩვენ გვექნება საგრანტო თანადაფინანსება, შესაბამისად, ნაწილი ტექნიკის ღირებულების იქნება სახელმწიფოს მხრიდან გრანტის სახით დაფინანსებული, დანარჩენი შეიძლება იყოს შეღავათიანი საკრედიტო ან სალიზინგო რესურსით დაფინანსებული. ჩვენ გვექნება მცირე მექანიზაციით დაფინანსების საშუალება ანუ 20 ათას ლარამდე ტექნიკის, ასევე საშუალო ფასის მექანიზაციის 20 ათასიდან 100 ათას ლარამდე ტექნიკის და ასევე მსხვილი 100 ათასზე მეტი ღირებულების ტექნიკის შემთხვევაში“, - აღნიშნა დავითაშვილმა.