მილიონიანი პროექტების განხორციელების მიუხედავად, ქალაქში დატბორვის პრობლემა კვლავ ვერ გვარდება. ბათუმში ყოველი გაწვიმებისას ქუჩები ვენეციას ემსგავსება. წყალი აღწევს სახლების პირველ სართულებსა და მაღაზიებში, ზიანდება საყოფაცხოვრებო ტექნიკა. ერთნაირად მძიმეა მდგომარეობა, როგორც ახლადრეაბილიტირებულ, ასევე სარეაბილიტაციო ქუჩებზე.
ძლიერი წვიმის შედეგად, თითქმის მთელი ქალაქი დაიტბორა. წყალმა მოიცვა როგორც რეაბილიტირებული, ისე სარეაბილიტაციო ქუჩები. ნალექის გამო ჭირდა ავტომანქანების გადაადგილება. მოძრაობა უჭირდა საზოგადოებრივ ტრანსპორტსაც.
წვიმის წყალმა დაფარა საცხოვრებელი სახლების სარდაფები და პირველი სართულები. ადამიანებს დაუზიანდათ საყოფაცხოვრებო ტექნიკა და ავეჯი. წყალი შევიდა კომერციულ ობიექტებშიც. მეპატრონეები სოლიდურ ზარალზე საუბრობენ.
ეს დატბორილი შენობა, ბათუმის რესპუბლიკური კლინიკური საავადმყოფოა, რომლის მშენებლობისთვის 28 მილიონამდე ლარი დაიხარჯა. წყალმა მთლიანად დაფარა ახალაშენებული სამედიცინო დაწესებულების ნულოვანი სართული. ჩვენი გადამღები ჯგუფი შენობაში დღეს არ შეუშვეს. ფოტოები სოციალურ ქსელში გავრცელდა.
დატბორვებთან დაკავშირებით, ბათუმის მერიის ცხელ ხაზზე დღის განმავლობაში 150-ზე მეტი, „ბათუმის წყალში“ კი 300-მდე შეტყობინება შევიდა.
ბოლო ათი წლის განმავლობაში, მიწისქვეშა კომუნიკაციის რეაბილიტაციისთვის 500 მილიონ ლარზე მეტი დაიხარჯა. თუმცა ფაქტია, რომ წყლის გამტარიანობა მაინც ჭირს იქ, სადაც მერიას სამუშაოები უკვე დასრულებული აქვს? რატომ? ბათუმის წყალში უხვ ნალექს სტიქიად აფასებენ და ამ კადრების მიუხედავად საპირისპიროს ამტკიცებენ.
გამოდარებას სინოპტიკოსები ხუთშაბათისთვის პროგნოზირებენ. იმის გამო, რომ უხვ ნალექს ისევ ელოდებიან, მერია, შესაბამისი სამსახურებით, მუშაობის საგანგებო რეჟიმზე გადავიდა.
4
s
s
s