„ქართული ოცნების“ მიერ, შარლ მიშელის შეთანხმების ანულირებულად ცნობას, საერთაშორისო უმწვავესი გამოხმაურება მოჰყვა. დასავლელი პარტნიორები შეშფოთებას ვერ მალავენ და ამბობენ, რომ საქართველოში, დამოუკიდებლობისა და დემოკრატიის მშენებლობა გაქრობის საფრთხის წინაშეა. მათი თქმით, შექმნილი რეალობიდან გამომდინარე ცალსახაა, რომ ხელისუფლებას არა ქვეყნის, არამედ საკუთარი მომავალი ადარდებს. მაღალი რანგის დიპლომატები ყურადღებას მიზანმიმართული სანქციების დაწესების აუცილებლობაც ამახვილებენ.
„ქართული ოცნების" ცალმხრივი გადაწყვეტილებით, გასულიყო 19 აპრილის შეთანხმებიდან, ძალზედ შეწუხებული და გაბრაზებულია ამერიკის შეერთებული შტატები. ამის შესახებ საელჩო წერს. გავრცელებულ განცხადებაში ვკითხულობთ, რომ მმართველი პარტიის ეს გადაწყვეტილება, ქვეყნისთვის, უფრო მეტ პოლიტიკურ არასტაბილურობას ქმნის და აჩენს კითხვებს „ქართული ოცნების" ერთგულებაზე საქართველოს დემოკრატიული მიზნების მიღწევისადმი.
„ქართულ ოცნებას“ მხოლოდ საკუთარი მომავალი ადარდებს და არა - მთელი ქვეყნის.“ - ასე ეხმაურება მმართველი გუნდის მიერ მიშელის შეთანხმების ანულირებას ამერიკელი სენატორი. ჯიმ რიშმა საკუთარი პოზიცია „ტვიტერზე“ საჯაროდ დააფიქსირა და დაწერა, რომ ქართველი ხალხი უკეთესს იმსახურებს.
მიშელის დოკუმენტის ანულირებას Twitter-ზე გამოეხმაურა ამერიკის სახელმწიფო დეპარტამენტის პრესსპიკერიც. ნედ პრაისი წერს, რომ მმართველი გუნდის ეს ნაბიჯი, ქვეყნისთვის საჭირო რეფორმების გატარებას ძირს უთხრის.
საქართველოში განვითარებულ მოვლენებს, სენატის ორპარტიულ ჯგუფთან ერთად, ჯინ შაჰინი და რონ ჯონსონიც აფასებენ. ამერიკელი სენატორების განმარტებით, საქართველოს დემოკრატიის მარცხით მხოლოდ კრემლი ისარგებლებს და მიმდინარე პროცესები აშშ-საქართველოს ორმხრივ ურთიერთობას დააზიანებს.
დოკუმენტის ანულირებას, ეხმაურება აშშ-ის სახელმწიფო მდივნის ყოფილი თანაშემწეც. დევიდ კრამერის პოზიციით, ახლა მიზანმიმართული სანქციების დროა, რათა "ქართული ოცნების" წევრები მიხვდნენ, რომ უკვე საკმარისია. იგი სრულ პასუხისმგებლობას მმართველ გუნდსა და ოლიგარქ ივანიშვილს აკისრებს.
„ქართული ოცნების“ მხრიდან, 19 აპრილს გაფორმებული დოკუმენტის ანულებას, სამწუხაროს უწოდებს ამერიკის შეერთებული შტატების თავდაცვის მდივნის ყოფილი მოადგილე. მაიკლ კარპენტერის განცხადებით, ევროკავშირის შუამავლობით მიღწეული შეთანხმება მხარს კანონის უზენაესობას უჭერდა.
Twitter-ის საშუალებით, შარლ მიშელის შეთანხმებიდან მმართველი გუნდის გასვლას, ბრიტანელი პოლიტიკური მიმომხილველიც ეხმაურება. დანიელ ჰამილტონის განმარტებით, ეს ქმედება ძირს უთხრის საქართველოსადმი, როგორც პარტნიორისადმი, ნდობას.
მომხდარს ამ დრომდე არ გამოხმაურებია შეთანხმების მთავარი მედიატორი, შარლ მიშელი. ევროპელი დიპლომატის მრჩეველმა, იურეკ კუჩკიევიჩმა Twitter-ზე დაწერა, რომ ამ ეტაპზე მხარეებთან კონსულტაციები მიმდინარეობს.
ცნობისთვის, საქართველოში განვითარებული მოვლენების განსახილველად, შარლ მიშელთან საფრანგეთში, სალომე ზურაბიშვილი ჩავიდა. ამის ამსახველი ფოტო საქართველოს პრეზიდენტის ადმინისტრაციამ გაავრცელა.