თამარის დასახლებაში ცხოვრება გაუსაძლის პირობებში უწევთ. ადგილობრივები ყოველ ზაფხულს ქვეწარმავლების სიმრავლეს ებრძვიან. ამბობენ, რომ გველები საცხოვრებელ სახლებთან ახლოს არაერთხელ შეუნიშნავთ. ამ ყველაფერს კი მოუწესრიგებელ მიმდებარე ტერიტორიას უკავშირებენ. როგორ პასუხობენ თამარ მეფის გამზირის 9-11 ნომერში მცხოვრებლების მოთხოვნებს მმართველ გუნდში?
თამარის დასახლებაში მცხოვრებლებს ზაფხულის სეზონთან ერთად წლებია ერთი საერთო პრობლემა აწუხებთ - ქვეწარმავლებით სავსე გარემო. მსგავსი ვითარება აქ ყოველწლიურადაა. გამონაკლისი არც წელს ყოფილა. ადგილობრივები გვიყვებიან, რომ უკვე რამდენჯერმე, საცხოვრებლებთან გველი იპოვეს. ახლა, შიშით ვერც სახლის ფანჯრებს აღებენ და გარეთ, ვერც ბავშვებს უშვებენ.
თამარ მეფის გამზირის 9-11 ნომერში მცხოვრებლები ქვეწარმავლების სიმრავლეს გაუმართავ ინფრასტრუქტურას აბრალებენ. ამბობენ, რომ რამდენიმე თვის წინ, ადგილზე სანიაღვრე სისტემის რეაბილიტაცია ჩატარდა, რამაც მოუწესრიგებელი სანაპირო ზოლი კიდევ უფრო დააზიანა. კერძოდ, გადათხარეს მიმდებარე ტერიტორია, სამუშაოები კი ბოლომდე არ მიუყვანიათ.
ზღვისპირა ზოლზე, რომლითაც არა მხოლოდ ადგილობრივები, არამედ ტურისტებიც სარგებლობენ, გადასასვლელი საცალფეხო ბილიკი მოაჯირის გარეშეა. ტერიტორიაზე ვერც ზღვაზე გადასასვლელ კიბეს იპოვით. ღამის საათებში გზას არც გარე განათება ანათებს. ყველაფერ ამას კი ანტისანიტარიაც ემატება, რადგან აქ მცხოვრებლების თქმით, სივრცეს რეგულარულად არ ასუფთავებენ.
ტერიტორიაზე, სანდასუფთავების სამსახურმა, რამდენიმე დღის წინ ქვეწარმავლების საწინააღმდეგო, სადეზინფექციო სამუშაოები ჩაატარა. ადგილობრივები კი ამბობენ, რომ კეთილმოწყობითი სამუშაოების არ ჩატარების შემთხვევაში, ეს პრობლემა კვლავ გაგძელდება. რაც შეეხება ინფრასრუქტურის სამსახურს, აქ გვითხრეს, რომ ტერიტორიაზე მოწყობითი სამუშაოების ჩატარება იგეგმება, თუმცა დეტალურად ვერაფერი განმარტეს.
8
s
s
s