ფრიდონ ხალვაშის ქუჩაზე მცხოვრებლები დახმარებას ითხოვენ. უხვი ნალექის შედეგად მოქალაქეებს საცხოვრებლები დაეტბორათ. გაუფუჭდათ საყოფაცხოვრებო ტექნიკა. ამბობენ, რომ უკვე მესამე დღეა უამინდობისგან გამოწვეულ შედეგებს საკუთარი ძალებით ებრძვიან, სპეციალური სამსახურები კი ამ დრომდე გამოძახებაზე არ მიდიან.

ამირან ჭურკვეიძე უკვე  მესამე დღეა ამ მდგომარეობაშია. ბათუმში მცხოვრებლები დატბორილ სახლებს, წყლისგან, საკუთარი ძალებით ასუფთავებენ, თუმცა, უხვი ნალექის გამო, ვითარება, კვლავ თავდაპირველ სურათს უბრუნდება. ფრიდონ ხალვაშის ქუჩაზე მცხოვრებლები ამბობენ, რომ ასეთი მდგომარეობა სანიაღვრე არხების არ არსებობის ბრალია.

ჭურკვეიძეების მსგავსად, ლია ზოიძეც, წყალდიდობას უკვე რამდენიმე დღეა ებრძვის. მარტოხელა დედა ორ მცირეწლოვანთან ერთად გაუსაძლის პირობებშია. ფიცრულში მცხოვრებ სამ წევრიან ოჯახს სტიქიამ საყოფაცხოვრებო ნივთები, ავეჯი და  ტანსაცმელი დაუზიანა. ლია შიშობს, რომ ღამის გათენება პატარებთან ერთად, ღია ცის ქვეშ მოუწევს.  გვიყვება, რომ  ცხელ ხაზზე არა ერთხელ დარეკა, დახმარების დაპირებაც მიიღო, თუმცა, ამ დრომდე არავინ გამოჩენილა.

ბათუმის მერიის მუნიციპალური სერვისების მართვის სააგენტოში ამბობენ, რომ აღნიშნულ მისამართებს სპეციალური კომისიები შეისწავლიან, რის შემდეგაც დაზარალებულებს შესაბამისი დახმარება გაეწევათ. ამ დრომდე უყურადღებოდ დარჩენილი ოჯახების წინაშე კი თავს, გამოძახებების სიმრავლით იმართლებენ.

Tags:

• დატბორვა
• წყალდიდობა
• ფრიდონ ხალვაშის გამზირი
• ტექნიკა

გაზიარება

4