უწყებათაშორის საკოორდინაციო საბჭოს გადაწყვეტილების თანახმად, 4 ოქტომბრიდან, მთელი ქვეყნის მასშტაბით, სასწავლო პროცესი საკლასო ოთახებსა და აუდიტორიებში განახლდება. ამის შესახებ ოპერაციული შტაბის უფროსმა, გიორგი ღიბრაძემ განაცხადა.

დაიწყებენ თუ არა აუდიტორიულ სწავლებას აჭარაში მოქმედი უმაღლესი სასწავლებლები? 

ბათუმის შოთა რუსთაველის სახელმწიფო უნივერსიტეტის საზოგადოებასთან ურთიერთობის სამსახურში გვითხრეს, რომ ამ საკითხზე იმსჯელებენ და საბოლოო გადაწყვეტილებას რამდენიმე დღეში მიიღებენ.

"ბსუ-ს სწავლების ონლაინ ფორმატი ჰქონდა გადაწყვეტილი, თუმცა დღევანდელი განცხადებებიდან გამომდინარე უნდა ვიმსჯელოთ და შესაბამის გადაწყვეტილებას სწორედ ამის შემდეგ მივიღებთ", - უთხრეს TV25.GE-ის ბსუ-ს პრეს-სამსახურში.

TV25.GE ბათუმის სახელმწიფო საზღვაო აკადემიასაც დაუკავშირდა. როგორც პრეს-სამსახურში გვითხრეს სწავლება შერეული პრინციპით განახლდება.

"იმ სასწავლო კურსებზე, რომლებზეც აუცილებელია პრაქტიკული ლაბორატორიული ან სიმულაციური სწავლება, მეცადინეობა წარიმართება უნივერსიტეტში, რეგულაციების დაცვით", - განაცხადეს საზღვაო აკადემიაში.

რაც შეეხება ბათუმის ხელოვნების უნივერსიტეტს, აქ გვითხრეს, რომ სასწავლო დაწესებულება გადაწყვეტილებას აცრილ სტუდენტთა რაოდენობის მიხედვით მიიღებს.

"რა თქმა უნდა, გვინდა აუდიტორიული სწავლება, თუმცა მნიშვნელოვანია აცრილ სტუდენტთა რაოდენობა. სწორედ, ამის მიხედვით მივიღებთ შესაბამის გადაწყვეტილებას. აუცილებლად განვაახლებთ დასწრებით სწავლებას პრაქტიკულ და საშემსრულებლო ნაწილში", - გვითხრა უნივერსიტეტის რექტორმა, მაია ჭიჭილეიშვილმა.

Tags:

• ბსუ
• ხელოვნების უნივერსიტეტი
• საზღვაო აკადემია

გაზიარება

7