მიხეილ სააკაშვილი საქართველოში დაბრუნებას 3 ოქტომბერს აანონსებდა, თუმცა ქვეყნის მესამე პრეზიდენტმა არჩევნებამდე ერთი დღით ადრე ყველას მოულოდნელი სიურპრიზი მოუწყო. „ნაციონალური მოძრაობის ლიდერი“ მხარდამჭერებს სოციალურ ქსელში საქართველოდან მიესალმა. მალევე ექსპრეზიდენტმა რამდენიმე ვიდეომიმართვა გაავრცელა,სადაც ჩანს, რომ ის ბათუმში, ქუთაისსა და თბილისში იმყოფებოდა. „ქართული ოცნების“ ლიდერები მთელი დღის განმავლობაში იმეორებდნენ, რომ ძებნილ სააკაშვილს საქართველოს საზღვარი არ გადმოუკვეთავს.დღის ბოლოს კი მმართველი პარტიის ლიდერებს უხერხული რეალობა დაუდგათ. პრემიერმა ღარიბაშვილმა საზოგადოებას აცნობა, რომ სააკაშვილი, თბილისში დაკავეს.
ეს ვიდეო სანზონაში, იმ სახლშია გადაღებული, სადაც საქართველოს მესამე პრეზიდენტი აიყვანეს. მიხეილ სააკაშვილის დაკავების ამსახველი ჩანაწერის მიხედვით, ყოფილ პრეზიდენტზე რაიმე სახის ძალადობა არ განხორციელებულა.
მიხეილ სააკაშვილი ახალი ბრალის წაყენების მოლოდინშია. უკვე მეხუთე დღეა ექსპრეზიდენტი რუსთავის მე-12 სასჯელაღსრულების დაწესებულებაში შიმშილობს. სააკაშვილთან შესახვედრად მეუღლე,დეპუტატი ლიზა იასკო ჩამოვიდა.
ყოფილი პრეზიდენტის სასამართლო პროცესი 10 ნოემბერსაა ჩანიშნული. სააკაშვილის ინტერესებს 6 ადვოკატი დაიცავს. მათი ინფორმაციით, ექსპრეზიდენტს ზარების განხორციელების უფლება შეუზღუდეს.
საქართველოს მესამე პრეზიდენტი ციხიდან კიდევ ერთ წერილს ავრცელებს. ამჯერად ადრესატი უკრაინის პრეზიდენტია. სააკაშვილი ზელენსკის მადლობას უხდის გაკეთებული განცხადებისთვის. წერს, რომ უკრაინა მისი მეორე სამშობლოა და ის პუტინის პირადი პატიმარია.
„ჩემზე ემოციურად ძალიან იმოქმედა თქვენმა სიტყვებმა, რომელიც არის მაღალი კლასის ნამდვილი სახელმწიფო მოხელის გამოხმაურება საქართველოში ჩემს უკანონო დაკავებასა და დაპატიმრებაზე გაყალბებული ბრალდებების საფუძველზე, რომლებსაც რუსეთის გარდა მსოფლიოში არავინ აღიარებს. სიცოცხლეზე მეტად მიყვარს ჩემი საქართველო, თუმცა ძალიან მიყვარს უკრაინაც, ჩემი მეორე სამშობლო, სადაც ჩემი ცხოვრების ბევრი წელი გავატარე და სადაც მყავს ოჯახი, მეგობრები, მაქვს მოქალაქეობა, რომელსაც მე ძალიან ვაფასებ. ვინაიდან ფაქტობრივად ვარ პუტინის პირადი პატიმარი, ძალიან ვაფასებ თქვენს პრინციპულ პოზიციას უკრაინის, მთელი რეგიონისა და იმპერიის ყველა პატიმრის დაცვასთან დაკავშირებით“
დაიწყებს თუ არა „ქართული ოცნება“ მოლაპარაკებას უკრაინის მხარესთან-უახლოეს პერიოდში გაირკვევა. საქართველოს პარლამენტის თავმჯდომარე, ოფიციალური ვიზიტით უკრაინაში გაემგზავრა. მმართველი გუნდის რიტორიკა უცვლელია. ამტკიცებენ, რომ სააკაშვილის მიმართ პოლიტიკური დევნა არ ხორციელდება
ოპოზიცია კი კვლავ პოლიტიკურ დევნაზე საუბრობს. ამბობენ,რომ ქვეყანაში დიდიხანია პოლიტიკური მართლმსაჯულება ხორციელდება.
მიხეილ სააკაშვილი თბილისში არჩევნებამდე ერთი დღით ადრე, თბილისში დააკავეს.
4
s
s
s